सुनसरीः सुनसरीको भोक्राहा नरसिंह–५ मा एक युवकको शव बोरामा हालेर फालिएको अवस्थामा फेला परेको छ ।
जिल्ला प्रहरी कार्यालय सुनसरीका प्रमुख एसपी कमल थापाले बोरामा बाँधेर पानीमा फालिएको अवस्थामा शव भेटिएको बताए । बिहीबारदेखि हराइरहेका नरसिंह–७ बस्ने २२ वर्षका गुणराज यादवको शव भोक्राहा नरसिंह–५ झोलुङ्गे पुलनजिक सुनसरी खोलामा प्लाष्टिकको बोरामा बाँधेर पानीमा फालिएको अवस्थामा शव भेटिएको थियो ।
शवको प्रकृति हेर्दा कसैले हत्या गरेर फालेको हुन सक्ने उनले बताए । यादवको हत्या आशंकामा तीन जनालाई प्रहरीले नियन्त्रणमा लिएको छ । शवको प्रकृति हेर्दा मृतकको कान काटिएको र टाउकोमा गहिरो चोट देखिएको उनले जानकारी दिए । उनको हात र खुट्टा समेत डोरीले बाँधिएको अवस्थामा फेला परेको उनले जानकारी दिए ।