अष्ट्रेलियाः धेरै संख्यामा नेपाली अध्ययन तथा रोजगारका लागि जाने गरेको देश अष्ट्रेलियामा बेरोजगारको संख्या थप बढ्दै गएको देखिएको छ ।
पछिल्लो दुई महिना जुन र जुलाईमा १६ हजार जना अष्ट्रेलियाली नागरिक बेरोजगार थपिएका छन् । जुन र जुलाईको यो तथ्यांकसहित यहाँ बेरोजगारको संख्या करिब दश लाख पुगेको पनि प्राप्त समाचारमा जनाइएको छ ।
अष्ट्रेलियाको तथ्यांक विभागका प्रमुख बिजोर्न जेभिसले सो कुराको जानकारी दिए । उनले अष्ट्रेलियामा कोभिड १९ को संक्रमणका कारणले पछिल्लो समयमा बेरोजगारहरूको संख्या बढ्दै गएको छ र पछिल्लो चरणमा यो समस्या झन् बढ्दो रुपमा रहेको छ ।
अष्ट्रेलियामा पहिलो पटक यति धेरै संख्यामा बेरोजगारहरूको संख्या देखिएको हो । विश्व स्वास्थ्य संगठनले गत मार्च ११ मा विश्वकै महामारीका रुपमा कोरोना भाइरसलाई घोषणा गरेको थियो । विश्वमा दुई करोडभन्दा बढी नागरिक यस संक्रमणबाट संक्रमित भएका छन् भने सात लाखभन्दा बढीको ज्यान गइसकेको छ । यता अष्ट्रेलियामा भने यसबाट २२ हजार नागरिक संक्र्रमित भएका छन् । त्यस्तै यहाँ ३६० भन्दा बढीको ज्यान गएको बताइएको छ ।