धरानः धरानस्थित बीपी कोइराला स्वास्थ्य विज्ञान प्रतिष्ठानमा पहिलोपटक दुर्लभ शल्यक्रिया भएको छ ।
१० वर्षीया बालिकाको अण्डाशयको दुरविन प्रविधिबाट सफल उपचार गरिएको प्रतिष्ठानका प्रवक्ता निदेश सापकोटाले जानकारी दिए ।
एक हप्ता अगाडि पेटको समस्या लिएर प्रतिष्ठान आएकी बालिका को सिटी स्क्यान गर्दा पेटमा दुवै अण्डाशयको १० गुणा १५ अm को ट्युमर रहेको पुष्टि भएको थियो । यसलगत्तै बिरामीलाई अप्रेसनको मिति तय गरेर दूरबीन प्रविधिबाट अप्रेसनको सल्लाह दिएको थियो ।
डा. अजय अग्रवाल र डा. मदन खड्काको टोलीले सफल शल्यक्रिया गरेका हुन् । प्रतिष्ठानमा यसअघि यस किसिमको शल्यक्रिया बच्चामा भएको छैन । दुरबीन प्रविधिबाट गरिने शल्यक्रिया सामान्य तय महङ्गो हुने गर्दछ । यस प्रविधिमा विशेष उपकरण र सीपको आवश्यकता चाहिन्छ । बालिकाको अवस्था सुधारोन्मुख रहेको डा. अग्रवालले जानकारी दिए । ‘उनको अवस्था सुधारोन्मुख छ, आज डिस्चार्ज हुनेछिन्’, डा. अग्रवालले भने ।
उनले बीपीमा पहिलो पटक यस्तो प्रविधिबाट उपचार भएको जानकारी दिए । दूरबिन प्रविधिबाट शल्यक्रियासम्बन्धी भर्खरै डा. अग्रवालले तालिम लिएर आएका हुन् । बालिका सानो भएकोले चिरेर शल्यक्रिया गर्दा दाग देखिने र जोखिम पनि हुने भएकोले १० वर्षीय बालिकामा प्रतिष्ठानमा पहिलोपटक दुर्लभ शल्यक्रिया गरिएको र सम्भवतः नेपालमै पहिलो हुन सक्ने डा. अग्रवालको भनाइ छ ।