धरानः धरानका स्कुल खोल्नेबारेमा अन्यौलता कायमै छ । धरान उपमहानगरपालिकामा बनाइएको सुझाव कार्यदलले कक्षा-८ देखि १० सम्म परीक्षणका रुपमा स्कुल चलाउन भन्दै सुझाव दिएपछि अहिले त्यो पनि थाँती छ । यसबारेमा पनि उपमहानगरपालिकाले केही निर्णय लिन सकेको छैन ।
अहिले उपमहानगरपालिकाले शिक्षक, स्कुल सञ्चालक, विज्ञ समूह, शिक्षाविद्को सुझाव लिइरहेको मेयर तिलक राईले जानकारी दिएका छन् ।उनले स्वास्थ्य मापदण्ड पुरयाएर स्कुल सञ्चालन गर्ने मनस्थितिमा उपमहानगरपालिका लागेको बताए । उनले एकातर्फबाट छलफल गरौं स्कुलचाहिँ वैकल्पिक व्यवस्थापनबाट खोलौं र दशैं, तिहार र छैठपछि सञ्चालन गरौं भन्ने सुझाव आएको जानकारी दिए ।
यसैबीच कोरोनाको जोखिम यथावत रहिरँदा धरानमा विद्यार्थीको पठनपाठन पुनः सञ्चालन गर्न अपनाउन सकिने शिक्षण सिकाइको वैकल्पिक विधि छनोटमा अन्योल देखिन थालेको छ ।
सरकारले जारी गरेको विद्यार्थी सिकाइ सहजीकरण निर्देशिका, २०७७ बमोजिम पठनपाठन सहजीकरण गर्न विद्यार्थीको वर्गीकरण र अभिलेखिकरणको काम भइरहँदा कस्तो विधि अपनाउन उपयुक्त हुन्छ भन्नेमा टुंगोमा पुग्न नसक्दा विद्यालय प्रशासन, शिक्षक र अभिभावकमा अन्योल देखिन थालेको हो ।
यद्यपि कतिपय विद्यालयले अनलाइन कक्षा चलाइरहेका छन् भने कतिपयले चलाएकै छैनन् । सिकाइका वैकल्पिक विधिबारे आआफ्नो अनुकूल हुने सुझाव अभिभावक र शिक्षकबाट आउन थालेपछि कुन विधि उचित हुन सक्छ भन्नेमा टुंगो लगाउन अलमल भएको हो ।