विराटनगरः टयाक्टर आफै अनियन्त्रित भई पल्टिँदा एकको मृत्यु भएको छ ।
ग्रामथान न.पा. १ लखन्तरीस्थित भित्री कच्ची सडकखण्डमा पश्चिमबाट पूर्व आउँदै गरेको को१त ८८१३ नं. को टयाक्टर आफै अनियन्त्रित भई सडक बाट अन्दाजी २० मिटर तल खसी दुर्घटना हुँदा टयाक्टरचालक बुढिगंगा गाउँपालिका १ बस्ने वर्ष ३० को गुरुचरण ऋषिदेवको मृत्यु भएको छ ।
दाहिनेपट्टिको ठूलो चक्काले किच्दा उनको घटनास्थलमै मृत्यु क्षेत्रीय ट्राफिक प्रहरी कार्यालय इटहरीले जनाएको छ ।
यस्तै, मोरङमै मोटरसाइलबाट लडेर मृत्यु भएको प्रहरीले जनाएको छ ।
विराटनगर–१५ रामजानकी चोक बस्ने वर्ष ६० की मनकामना झा को मोटरसाइकलबाट लडेर मृत्यु भएको हो ।
बिरामी भई विराटनगर मनपा ९ बुद्धचोकस्थित भित्री सडकखण्डमा रोडशेषबाट न्यूरो अस्पताल आउने क्रममा निजकै छोराले चलाई ल्याएको को१२प ३५६ नं. को मोटरसाइकलमा अस्पताल आउँदा अचानक लडी उनी गम्भीर घाइते बनेकी थिइन् । उनको न्यूरो अस्पतालमा उपचारको क्रममा निधन भएको थियो । मोटरसाइकल चालक निजकै छोरा वर्ष २२ को राजन झा प्रहरीको नियन्त्रणमा रहेको प्रहरीले जनाएको छ ।
उता झापाको दमक–४ जानकी टोलस्थित उत्तर–दक्षिण भित्री सडकखण्डमा दक्षिणबाट उतर जाँदै गरेको मे१त ६१९६ नं. को ट्याक्टरले बाटोमा खेल्दै गरेका तुलसीप्रसाद धिमालको छोरा वर्ष ८ का जेनिष धिमाललाई ठक्कर दिँदा गम्भीर घाइते भएका थिए । उनको अरनिको अस्पताल उर्लाबारीमा उपचारको क्रममा मृत्यु भएको प्रहरीले जनाएको छ । टयाक्टर चालक वर्ष २५ को धनेश्वर दर्जी प्रहरी चौकी ताराबारीको नियन्त्रणमा रहेको प्रहरीले जनाएको छ ।
यस्तै, सुनसरीमा सिटी सफारी र मोटरसाइकल आपसमा ठक्कर खाँदा एकजना गम्भीर घाइते भएका छन् । भोक्रहा नरसिह गा.पा. ६ फूलचौकस्थित पूर्व पश्चिम लोकमार्गमा पूर्वबाट पश्चिम जाँदै गरेको को३५प ६६०० नं. को मोटरसाइकल र विपरीत दिशाबाट आउँदै गरेको प्र१–०२–००२ ह ५०२ नं. को सिटी सफारी आपसमा ठक्कर खाएका थिए ।
सिटीमा सवार वर्ष २८ कि गुञ्जा साह गम्भीर घाइते बनेका छन् भने मोटरसाइकल चालक विराटनगर ४ बस्ने वर्ष २८ को पवन सिह सामान्य घाइते बनेका छन् । उनीहरुको जिल्ला अस्पताल इनरुवामा उपचार भइरहेको छ । सिटी चालक जिल्ला सुनसरी कोशी गाउँपालिका २ बस्ने वर्ष ३८ को जोगिन्द्र साह प्रहरीको नियन्त्रणमा रहेको प्रहरीले जनाएको छ ।