धरानः सुनसरीको इनरुवा नगरपालिका–२ बलाहा नहरबाट २ सय ५० केजी गाँजासहित २ जनालाई पक्राउ गरिएको छ ।
को१च ९८५२ नम्बरको बलेरो गाडीमा ठूलो परिणाममा गाँजा तस्करी भइरहेको भन्ने विशेष सूचनाका आधारमा इलाका प्रहरी कार्यालय महेन्द्रनगरबाट बुधबार बिहान २ बजेको समयमा प्रहरी निरीक्षकसहितको कमाण्डमा खटिएको प्रहरी टोलीले ब्यारिकेटसहित चेकिङ राखेकोमा बराहक्षेत्रबाट आएको सो नम्बरको गाडी ब्यारिकेट लडाएर फरार भएको थियो ।
ब्यारिकेटलाई क्षति गरी फरार भएको सो गाडीलाई जिल्ला प्रहरी कार्यालय सुनसरीबाट प्रहरी उपरीक्षकको कमाण्डमा खटिएको प्रहरी टोलीले बलाहा नहरबाट बिहान पौने ४ बजे नियन्त्रणमा लिएको हो । ब्यारिकेट लडाएर भागेको सो गाडीलाई नियन्त्रण लिन एक राउण्ड फायर समेत भएको थियो भने सो गाडीले भाग्ने क्रममा को१ब २४३६ र को१ब २१०५ नम्बरको मोटरसाइकललाई समेत क्षति पुरयाएको तथा एकजना प्रहरी समेत घाइते भएका छन् ।
कोशीपुलबाट भागेको सो गाडीलाई बलाहा नहरबाट राति नै नियन्त्रणमा लिएको हो । गाडीसँगै चालक भोजपुर हतुवागढी गाउँपालिका–९ का २७ वर्षीय अर्जुन खड्का र गाडीमा सवार रहेका धरान–१ का २६ वर्षीय ज्याक्सन श्रेष्ठलाई पक्राउ गरिएको छ भने गाडीमा रहेको २५० केजी गाँजा, नगद १ लाख ५४ हजार र १ थान खुकुरी समेत बरामद भएको छ । घटना सम्बन्धमा जिल्ला प्रहरी कार्यालय सुनसरीले थप अनुसन्धान गरिरहेको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी नायव उपरीक्षक बिपिन रेग्मीले जानकारी दिए ।