धरानः धरानमा लिम्बू भाषा, लिपीबारे लिम्बू जातिभन्दा पनि अन्य जातिले बढी चासो दिएको पाइएको छ ।
धरान उपमहानगरपालिका १५ नं. वडाको सहयोग तथा लिम्बू भाषा लिपी प्रशिक्षण केन्द्रको आयोजनामा धरान–१५ स्थित श्री बद्रीनाथ आधारभूत विद्यालयमा सञ्चालित पाँचदिने किरात सिरिजङ्गा लिपी लेखन प्रशिक्षण कार्यक्रम आयोजना भएको थियो ।
तालिममा कक्षा ३ देखि ८ सम्मका ६७ जनाले नाम लेखाएपनि ५४ जना विद्यार्थीहरुले नियमितरुपमा किरात शिरिजङ्गा लिपी र केही लिम्बू भाषा सिकेका थिए । सहभागी विद्यार्थीहरुमा ५ जना लिम्बू, ९ जना राई, ९ जना क्षेत्री बाहुन, २३ जना दलित, ४ जना तामाङ, २ जना मगर, १ जना गुरुङ र १ जना चौधरी रहेका थिए । माघ २१ गतेदेखि २५ गतेसम्म यस्तो तालिम आयोजना भएको थियो ।
किरात सिरिजङ्गा लिपी सिक्न लिम्बू समुदायभन्दा अन्य जाति बढी इच्छुक देखिएको धरान–१५ का जनप्रतिनिधिहरुले समेत बताएका छन् । समापन कार्यक्रममा पनि उनीहरुले यसो नै भने ।
समापन कार्यक्रमका प्रमुख अतिथी वडा सदस्य रामकाजी राईले (नेपाल बहुभाषिक, बहुसांस्कृतिक राष्ट्र भएकोले सबै जातिको भाषा, लिपी, संस्कार, संस्कृति सिक्नुले हामीलाई सामाजिकरुपमा काम गर्न सहज हुने बताए ।
त्यस्तै, वडा सदस्यद्वय जानुका कार्की र नरमाया विकले कुनैपनि जातिको भाष, लिपी देशको सम्पत्ति भएकोले सरकारी तवरबाट नै ऐच्छिक नभई शैक्षिक रुपमा अगाडी बढाउनुपर्ने र सम्बन्धित संस्थाहरुले सरकारसमक्ष पहल कदमी गर्नुपर्ने बताए ।
त्यस्तै, कियाचु सुनसरी अध्यक्ष मोहनकुमार हुक्पाचोङवाङले सबै जातिको भाषा, लिपी देशको सम्पत्ति ो तर यसको विकासको निमित्त सरकारसँग आर्थिक सहयोग माग गर्नुपर्ने बिडम्बना रहेको बताए । स्कुलका प्रअ देवराज लिम्बूले स्कुलमा अध्ययनरत विद्यार्थी लिम्बू समुदायको भन्दा गैर लिम्बूहरु बढी भएतापनि किरात सिरिजङ्गा लिपी र लिम्बू भाषा सिक्न इच्छुक रहेको बताए ।
सबै प्रशिक्षार्थीहरुलाई प्रमुख अतिथी तथा अतिथिहरुले प्रमाणपत्र र नोटबुक वितरण गरेका थिए । पाँचदिने सो कार्यक्रमको उद्घाटन वडाध्यक्ष नरेश इवारमले माघ २१ गते लिपी लेखेर शुभारम्भ गरेका थिए । कार्यक्रम लिम्बू भाषा, लिपी प्रशिक्षण केन्द्रका अध्यक्ष एवम् प्रशिक्षक स्वर्णिमहाङ फोम्बो लिम्बूको अध्यक्षतामा सम्पन्न भएको थियो ।