बिर्तामोडः विभिन्न स्थानबाट चेकजाँचको क्रममा लागूऔषधसहित पाँचजनालाई पक्राउ गरिएको छ ।
झापा बुद्धशान्ति–३ स्थित झिलमिले पुलबाट सोही स्थानका २३ वर्षीय मुकुन्द राजवंशी ५ ग्राम ४१० मिलिग्राम र झापा भद्रपुर–८ सगरमाथा चौकबाट सोही स्थानका २४ वर्षीय दिनेश राजवंशी ६ ग्राम ५० मिलिग्राम खैरोहिरोइन ब्राउन सुगरसहित पक्राउ परेका हुन् ।
पक्राउ परेका दुवैजनाको सम्बन्धमा थप अनुसन्धान भइरहेको जिल्ला प्रहरी कार्यालय झापाले जनाएको छ । यसैगरी उदयपुर त्रियुगा –६ लालपत्तास्थितबाट लागूऔषधसहित तीनजना पक्राउ परेका छन् ।
पक्राउ पर्नेमा सिरहा लहान ३ का २३ वर्षीय सुजित चौधरी, सप्तरी खडक–१ का २२ वर्षीय महेशकुमार चौधरी र उदयपुर त्रियुगा–४ का १९ वर्षीय होमबहादुर मगर रहेको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी नायव उपरीक्षक बिपिन रेग्मीले जानकारी दिए ।
सुजित र महेशलाई लागूऔषध डाइजेपाम–३५ एम्पुल, लुपिजेसिक–३५ एम्पुल र फेनागन–३५ एम्पुलसहित पक्राउ गरिएको हो भने होमबहादुरलाई लागूऔषध नाइट्राजिपाम ७५ ट्याब्लेटसहित पक्राउ गरिएको जिल्ला प्रहरी कार्यालय उदयपुरले जनाएको छ ।