धरानः धरान–१२ स्थित एम्स एकेडेमीमा तेश्रो सास्कृतिक दिवसका अवसरमा शुक्रबार एकल नृत्य प्रतियोगिता सम्पन्न भएको छ ।
एम्स क्रिएटिभ ग्रुप (एसिजी) को आयोजनामा भएको प्रतियोगीतामा राजेश तामाङ पहिलो भएका छन् भने दृष्टि राई, उषा कार्की र एकता जिमी क्रमशः दोश्रो, तेश्रो र सान्त्वना भए ।
बिजेताहरुलाई कलेजका अध्यक्ष प्रकाश राई, प्रिन्सिपल मित्र तामाङ, वित्तीय संयोजक हेमन्त भण्डारीलगायतले मेडल र ट्रफी प्रदान गरेका थिए ।
प्रतियोगितामा ११ जना विद्यार्थीहरु सहभागी भएका थिए । प्रतियोगीताको निर्णायकमा वरिष्ठ नृत्य प्रशिक्षक नगेन्द्र राई रहेका थिए । कलेजका अधिकांश प्राध्यापक र विद्यार्थीहरु आ–आफ्नो भेषभुषा झल्काउने सांस्कृतिक पोशाकमा उपस्थित भएका थिए ।
विद्यार्थीहरुलाई आफ्नो संस्कार, संस्कृतिप्रति जागरुक बनाउन साँस्कृतिक दिवस राखिएको कलेजका ब्यवस्थापन सङ्कायतर्फका कार्यक्रम संयोजक दुर्गा सुवेदीले जानकारी दिए ।
नयाँ पुस्ताका विद्यार्थीहरुले आफ्नो मौलिक संस्कृति बिर्सदै जान थालेको हुनाले आफ्नो संस्कार, भेषभुषाको संरक्षण गर्नको लागि उत्प्रेरित गर्न प्रत्येक वर्ष यो कार्यक्रम गरिने कलेजका शैक्षिक निर्देशक नेत्र सुवेदीले जानकारी दिए ।
आफ्नो संस्कार, संस्कृतिको संरक्षण कसरी गर्नुपर्छ भन्ने कुरामा विद्यार्थीहरुलाई जिम्मेवार बनाउन यस्ता कार्यक्रमले टेवा पुग्ने कलेजका अध्यक्ष राईले बताए । एसिजीका अध्यक्ष निशान राईको अध्यक्षतामा भएको कार्यक्रमको सञ्चालन छात्रा जानुका अधिकारीले गरेकी थिइन् । एसिजी कलेजका विद्यार्थीहरुलाई रचनात्मक र सामाजिक कार्यमा उत्तरदायी बनाउन स्थापना गरिएको संस्था हो ।