धरानः पानी बोक्ने ट्याङकरले स्कुटरलाई ठक्कर दिँदा एक महिलाको मृत्यु भएको छ । मृत्यु हुनेमा बाह्रदशी गाउँपालिका–७ कि ३३ वर्षीय कमला राजवंशी रहेको प्रहरी कार्यालय झापाका डिएसपी राकेश थापाले जानकारी दिए ।
दुर्घटनामा उनका श्रीमान ४८ वर्षीय सुशील राजवंशी घाइते भएका छन् । मृतक कमला राजवंशी उनका श्रीमान सुशील मे७प ४९४१ नम्बरको स्कुटरमा सवार रहेकी थिइन् । ना१ख ९६२५ नम्वरको पानी बोक्ने ट्याङ्करले ठक्कर दिँदा उनको मृत्यु भएको प्रहरीले जनाएको छ । घाइते सुशीलको बिर्तामोडस्थित बिएण्डसी अस्पतालमा उपचार भइरहेको बताइएको छ ।
ट्याङ्कर चालक पाँचथरका ३३ वर्षीय नरेश पदक फरार रहेको प्रहरीले जनाएको छ । उनको खोजी भइरहेको इलाका प्रहरी कार्यालय घैलाडुब्बाले जनाएको छ ।