धनकुटाः धनकुटा नगरपालिका–६ स्थित हाँडीखर्क सामुदायिक वनमा भीषण आगो लागेको छ । शनिबार दिउँसो साढे ३ बजेबाट शुरु भएको आगो अझै नियन्त्रणमा आइनसकेको प्रहरीले जनाएको छ ।
आगो बढ्दै गएकाले आसपास क्षेत्रको बस्ती जोखिममा परेको छ । ‘विशेषतः आगो जंगलक्षेत्रको लामो एरियामा फैलिएको छ, त्यही भएर पनि निभाउन सकिरहेका छैनौं,’ धनकुटाका प्रहरी प्रमुख गोविन्द अधिकारी भन्छन्, ‘दमकल पुग्न पनि सडक नभएकोले समस्या छ ।’
नेपाल प्रहरी, सशस्त्र प्रहरी र स्थानीयबासीले आगो नियन्त्रणको प्रयास जारी राखेको उनले जानकारी दिए । ‘अहिले पनि सबै लागेर आगो निभाउने प्रयासमा छौं ।’ उनले भने ।

आगो नियन्त्रण हुन नसक्दा बस्ती समेत जोखिममा परेको छ । शुरुमा चिरबिरे चौतारा आसपासबाट आगलागी शुरु भएको थियो । हावाहुरीका कारण तीब्ररुपमा आगो फैलिएको प्रहरी प्रमुख अधिकारीले जानकारी दिए ।
आगलागीबाट चुलिवननजिकको एउटा घर जलेर नष्ट भइसकेको छ । दिउँसो जंगलको तल्लो भागबाट शुरु भएको आगो अहिले बस्तीतर्फ बढ्दै गएको छ । आगलागी नियन्त्रणमा नआए औद्योगिक ग्रामसहित आसपासको करिब ३०–३५ घर जोखिम रहेको स्थानीयबासीले बताएका छन् । आगो बढ्दै गएमा औद्योगिक ग्रामसहित आत्मारा, कोल्डस्टोर र फोक्लेण्ड टापु टोलबस्तीसमेत जोखिममा रहेको स्थानीयबासी बताउँछन् ।