धरानः नेपाल साफ च्याम्पियनसीप १३ औं सस्करणसम्म आइपुग्दा फाइनलमा पुग्ने सम्भावना बढेर गएको छ । एकपटक फाइनल नपुगेको नेपालले यस वर्ष अवसर नगुमाउने विश्वास लिइएको छ ।
मालदिभ्समा आइतबार राति हुने भारतविरुद्धको खेलमा बराबरीको नतिजा निकाले मात्र पनि नेपाल फाइनल पुग्न सक्नेछ । तर अर्को खेलमा श्रीलंकाले मालदिभ्सलाई हराउनुपर्नेछ ।
माल्दिभ्समा जारी १३ औं साफ च्याम्पियनसिप फुटबलमा नेपालको फाइनलमा पुग्ने सम्भावना बलियो भएको छ । दाबेदार भारत लगातार २ खेलमा बराबरीमा रोकिँदा र अर्को खेलमा माल्दिभ्सले बंगलादेशलाई हराउँदा नेपालको सम्भावना बढेको हो । २ खेलमा शतप्रतिशत नतिजा ल्याएर ६ अंक जोडेको नेपालको फाइनलमा पुग्ने प्रबल सम्भावना देखिएको छ ।
नेपाली राष्ट्रिय टिमका पूर्व सहायक प्रशिक्षक मेघराज केसी पछिल्ला नतिजाले नेपाललाई फाइनलमा पुग्ने मात्र होइन उपाधिकै हकदार बनाउने छाँट देखिएको बताउँछन् । ‘नेपालले जुन नतिजा दिइरहेको छ, अझ स्कोर गरिरहेको छ’, उनले भने, ‘यो उत्कृष्ट नतिजा हो, फाइनल मात्र नभई उपाधि नै जित्ने प्रबल दाबेदार नेपाल देखियो। नेपालले श्रीलंका र घरेलु टोली माल्दिभ्सलाई पाखा लगाइसकेको छ ।
नेपालले अन्तिम खेलमा अक्टोबर १३ तारिखमा बंगलादेशसँग खेल्नेछ । सोही दिने हुने अर्को खेलमा भारतले मालदिभ्सको सामना गर्नेछ ।
भारतविरुद्ध हुने खेलमा जित हात पारे नेपाल फाइनल पुग्ने छ । बराबरी वा हारको अवस्थामा पनि नेपाल फाइनल पुग्ने बलियो दावेदार रहने छ । नेपाल भारतसँग पराजित भएमा र आइतबारको अर्को खेलमा मालदिभ्सले श्रीलंकालाई हराए फाइनल पुग्ने समिकरण रोमान्चक बन्नेछ । त्यस्तो अवस्थामा तीन खेलबाट भारतको ५, मालदिभ्सको ६ र नेपालको पनि ६ अंक हुने छ । यस्तो नतिजा आएका खण्डमा नेपालले बंगलादेशसँग पनि हार ब्यहोरे र मालदिभ्सले भारतसँग बराबरी खेले नेपाल फाइनल पुग्न सक्ने छैन ।
तर भारतसँग पराजित भएको अवस्थामा नेपालले बंगलादेशसँग बराबरी खेलेपनि फाइनल पुग्ने सम्भावना रहने छ । नेपाललेरु पहिलो खेलमा साविक विजेता मालदिभ्सलाई १–० र दोस्रो खेलमा श्रीलंकालाई ३–२ गोलले हराएको थियो । भारतले बंगलादेशसँग १–१ गोलको बराबरी र श्रीलंकासँग गोलरहित बराबरी खेलेको हो । पहिलो खेलमा श्रीलंकालाई १–० गोलले पराजित गरेयता बंगलादेशले जित हात पार्न सकेको छैन ।