धरानः ड्रिम मोडलिङ एजेन्सी इभेन्ट मेनेजमेन्ट प्रालिको आयोजनामा भइरहेको जुनियर मिस धरान–२०२१ को उपाधिका लागि २३ जना बालिकाहरू भिड्ने भएका छन् ।
प्रालिका सिइओ सौरभमान भण्डारीले यही कार्तिक १३ गते शनिबारको दिन धरानस्थित बीपी प्रतिष्ठानको दशहरा हलमा दिउँसो १ बजेबाट फिनाले हुने पत्रकार सम्मेलनमा जानकारी दिए । ‘किशोरीहरूमा क्षमता अभिवृद्धि गर्ने उद्देश्यले जुनियर मिस धरान आयोजना गरिएको हो’, उनले भने, ‘उपाधिका लागि २३ जना बालिकाहरू रहेका छन्, हाल तालिम भइरहेको छ ।’
धरानमा पहिलोपटक हुन लागेको प्रतियोगिताको बिजेताले नगद १५ हजार रुपैयाँसहित ५ लाख रुपैयाँ बराबरको बिमा प्राप्त गर्ने भण्डारीले बताए । त्यस्तै, फस्ट रनरअपले १० हजार रुपैयाँ र ३ लाख रुपैयाँ बराबरको बिमा र सेकेन्ड रनरअपले नगद ५ हजार रुपैयाँसहित २ लाख रुपैयाँको बिमा प्राप्त गर्ने उनले जानकारी दिए ।
गत फागुनदेखि नै सुरु भएको प्रतियोगिता कोरोना महामारीका कारण स्थगित भएर पुनः भदौ २२ गतेदेखि बन्द परीक्षण सुरु गरिएको कार्यक्रम संयोजक निश्चल पलिखेले जानकारी दिए । ६ देखि १४ वर्षसम्मका बालिकाहरू सहभागी रहेको प्रतियोगितामा बिजेताहरू बाहेक १२ वटा अन्य टाइटलमा समेत पुरस्कृत हुने पलिखेले बताए ।