धरानः ताप्लेजुङमा ट्याक्टर दुर्घटनामा गम्भीर घाइते बनेका दुईजना युवाको मृत्यु भएको छ ।
एक युवाको धरानमा उपचारका क्रममा मृत्यु भएको हो भने अर्का युवाको ताप्लेजुङस्थित तेल्लोक स्वास्थ्य केन्द्रमा मृत्यु भएको हो ।
मृत्यु हुनेमा ताप्लेजुङ सिरिजङ्घा–३ बोखिमका २५ वर्षीय वसन्त लिम्बू र १५ वर्षीय समिर लिम्बू रहेको प्रदेश १ ट्राफिक प्रहरी कार्यालय इटहरीका डिएसपी सुमन तिम्सिनाले जानकारी दिए । वसन्त ट्याक्टर चालक हुन् ।
वसन्तको शुक्रबार साँझ साढे ५ बजे धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको उनले जानकारी दिए । यस्तै, समिरको तेल्लोक स्वास्थ्य केन्द्रमा ल्याई चेकजाँच गर्दा डाक्टरले मृत घोषणा गरेको प्रहरीले जनाएको छ ।
यस्तै, ट्याक्टरमा सवार अन्य दुईजनाको अवस्था गम्भीर रहेको प्रहरीले जनाएको छ । २३ वर्षीय अमिन लिम्बू र १९ वर्षीय सुसन लिम्बूको अवस्था गम्भीर रहेको प्रहरीले जनाएको छ ।
ताप्लेजुङ सिरिजङ्घा–३ बोखिमस्थित भित्री सडक खण्डमा उत्तरबाट दक्षिणतर्फ गोलिया लिई जाँदै गरेको मे१त ६८९३ न.को ट्याक्टर सडकबाट अन्दाजी २०० मिटर तल खसेको थियो ।