धरानः इन्टरपोलबाट रेड नोटिस जारी गोरे समूहका अर्का एक व्यक्ति पनि पक्राउ परेका छन् ।
इन्टरपोलबाट रेड नोटिस जारी गरिएका चुडामणि उप्रेती उर्फ गोरे समूहका अर्का व्यक्ति पनि पक्राउ परेका हुन् ।
झापा साविक शिवगञ्ज गाविस १ का ५० वर्षीय कृष्णगोपाल अग्रवाललाई आइतबार युएईबाट आउँदा गर्दा पक्राउ गरिएको प्रहरी प्रधान कार्यालयले जानकारी दिएको छ । उनीविरुद्ध जिल्ला अदालत मोरङमा मुद्दा दायर छ ।
उनी ३३ किलो सुन काण्डमा इन्टरपोलबाट रेड नोटिस जारी गरिएका फरार प्रतिवादी हुन् । ३३ किलो सुन काण्डमा गोरे भनिने चुडामणि उप्रेती समेत रहेको आपराधिक समूह स्थापना र सञ्जाल गरी सुनको तस्करी, अपहरण र शरीर बन्धक तथा कर्तव्य ज्यान मुद्दामा उनको संलग्नता देखिएको भन्दै प्रहरीले उनीविरूद्ध रेड नोटिस जारी गरेको थियो ।
उनी दुबईबाट नेपाल आउँदैछन् भन्ने सूचनाको आधारमा इन्टरपोल शाखाबाट खटिएको टोलीले उनलाई पक्राउ गरेको हो ।
अग्रवाललाई जिल्ला प्रहरी कार्यालय मोरङको अनुरोधमा २०७५ साउन ८ गते अन्तर्राष्ट्रिय स्तरमा खोजतलास एवं पक्राउको लागि इन्टरपोल महासचिवालयबाट रेड नोटिस जारी भएको थियो ।
आइतबार साँझ नै विमान मार्फत उनलाई मोरङ पठाइएको छ ।