धरानः धरानमा तीनदिने धरान उत्सव (धरान डे) शुरु भएको छ ।
पब्लिक स्कुलको खेल मैदानमा आयोजित उत्सवको प्रधानमन्त्री शेरबहादुर देउवाले गरेका छन् । धरान दिवस २०७८ लेखिएको ब्यानरसहितको बेलुन उडाएर उनले केक समेत काट्दै उत्सवको उद्घाटन गरेका हुन् ।
धरान स्थापना भएको १२१ औं वर्षको अवसरमा तीनदिने धरान उत्सव अर्थात् धरान डे मनाइएको हो । धरान उपमहानगरपालिकाले पुस २० गतेलाई धरान स्थापना भएको दिनकोरुपमा मानेर धरान डे मनाउँदै आएको छ ।
धरान उत्सवका अवसरमा धरानमा विभिन्न जातीय खानेकुराका स्टलहरु राखिएका छन् । जसमध्ये तीनपाने रक्सी र कालो बङ्गुरको छुट्टाछुट्टै स्टल समेत राखिएको छ । धरान उपमहानगरपालिकाले तीनपाने रक्सी र कालो बङ्गुरलाई ब्राण्डिङ गर्ने निर्णय समेत गरेको छ । यस्तै, स्वास्थ्यसँग सम्बन्धित सामग्री पनि स्टलमा राखिएका छन् भने फूललगायतका स्टल पनि छन् ।
उत्सवमा दिनहुँजसो सांगीतिक, साहित्यिक कार्यक्रमहरु पनि आयोजना हुनेछन् । दोस्रोदिन सबै वडा कार्यालय मार्फत टीएलओ परिचालन गरी वडा सरसफाई गर्ने, संघसंस्था परिचालन गरी जिरोप्वाइन्टदेखि तिनकुनेसम्म प्लाष्टिक सरसफाइ कार्यक्रम र मास साक्लिङ आयोजना गर्ने कार्यक्रम रहेको जनाइएको छ ।
यस्तै, बिहान साढे १० बजे धरान प्रज्ञा प्रतिष्ठानको समन्वयमा बहुभाषिक कविता गोष्ठी हुनेछ भने दिउँसो धरानको दिर्घकालिन विकास सम्भावना तथा अवसर विषयक कार्यपत्र प्रस्तुती र छलफल हुनेछ । यस्तै, तेस्रो दिन रस्सी तान प्रतियोगितालगायत कार्यक्रमहरु आयोजना गर्दै धरान डे समापन गरिने जनाइएको छ । तस्वीरहरुः हाम्रो कोशी आवाज