धरानः नेकपा एमालेका महासचिव शंकर पोख्रेल आज (शुक्रबार) साँझ नै धरान आउने भएका छन् ।
शनिबार धरान–१५ स्थित चुम्लुङ हिममा आयोजना हुने अगुवा कार्यकर्ता भेला तथा पार्टी प्रवेश कार्यक्रमको लागि उनी धरान आउन लागेका हुन् । एमाले सुनसरी जिल्ला कमिटीको आयोजना तथा धरान उपमहानगर कमिटीको व्यवस्थापनमा सो कार्यक्रम हुन लागेको हो । जिल्ला कमिटीले शुक्रबार धरानस्थित पार्टी कार्यालयमा पत्रकार सम्मेलन गर्दै सोबारे जानकारी गराइएको हो ।
१० औं राष्ट्रिय महाधिवेशनले निर्धारण गरेको कार्यक्रम, नीतिको बारेमा प्रशिक्षण हुने एमाले जिल्ला अध्यक्ष रेवतीरमण भण्डारीले जानकारी दिए ।
प्रशिक्षणसँगै नेकपा माओवादी केन्द्र, नेपाली कांग्रेसलगायत विभिन्न पार्टीबाट एमालेमा समाहित हुने करिब ६ सय नेता, कार्यकर्तालाई स्वागत गरिने उनले जानकारी दिए । उनले एमालेमा नेकपा माओवादी केन्द्रका कार्यकर्ता धेरै आउने दावी गरे । ‘भोलि नै थाहा पाइहाल्नुहुन्छ’, उनले भने, ‘विशेषतः माओवादी केन्द्रका कार्यकर्ता नै बढी हुनुहुन्छ, उहाँहरु स्थानीयदेखि प्रदेश कमिटीमा पनि पुगिसकेका हुनुहुन्छ, अझ भन्ने हो भने एउटा वडामा त माओवादीको शुन्य नै हुन्छ भन्ने हामीलाई लागिरहेको छ, कुन वडा हो त्यो भन्दैनौं, भोलि सबै कुरा खुलिहाल्छ ।’