धरानः धरानमा यथास्थितिमा मिलेनियम च्यालेन्ज कप्याक्ट (एमसीसी) पारित गर्ने वा नगर्ने सडक जनमत सङ्ग्रह कार्यक्रमको आयोजना भएको छ ।
धरानस्थित भानुचोकमा ब्यानरसहित टाँगेर मत मागिएको थियो । युवा, विद्यार्थी, नेता, मजदुरलगायत सर्वसाधारणले मतदान गरेका छन् । करिब एक घण्टामै दुई सय मत खसेको थियो ।
नेकपा माओवादी केन्द्रनिकट विद्यार्थी सङ्गठन अखिल क्रान्तिकारी सुनसरीले कार्यक्रमको आयोजना गरेको सुनसरी जिल्ला सदस्य आशिष थापाले जानकारी दिए । ‘सडकमा हिँडिरहेका सर्वसाधारणको राय लिन र जनमत बटुल्न यस्तो कार्यक्रम आयोजना गरेका हौं ।’ उनले भने ।
यसैबीच २ सय मत खसेकोमा १ सय ८६ जनाले एमसीसी यथास्थितिमा पारित गर्न नहुनेमा मत खसाएका छन् भने पारित गर्नुपर्छ भन्ने पक्षमा ११ जनाले मतदान गरेका छन् । यस्तै, ३ मत बदर समेत भएको थियो ।
माओवादी केन्द्रका धरान नगर इन्चार्ज तथा प्रदेश सदस्य अइन्द्रविक्रम बेघाले एमसीसी यथास्थितिमा पारित हुनु हुँदैन भन्ने पक्षमा आफूले मत खसालेको बताए । माओवादीकी नेतृ भूमिका चौलागाईंले कुनैपनि हालतमा यथास्थितिमा एमसीसी पास गर्न नहुने धारणा राखिन् ।
यसअघि माओवादी केन्द्रले केन्द्रमै पनि एमसीसीबारे जनमत सङ्ग्रह गर्नुपर्ने प्रस्ताव राख्दै आएको छ । ‘हामीले भन्दै आएका छौंैं, सकिन्छ भने जनमत सङ्ग्रह गरौं, सकिन्न भने गोलमेच सम्मेलन गरेर एउटा आवाज निर्माण गरौं ।’ नेतृ भूमिकाले भनिन् ।
अखिल क्रान्तिकारीका केन्द्रीय सचिवालय सदस्य खेम रनपहेलीले एमसीसी राष्ट्रघाती यसलाई संसदको बहुमतले पास गर्नुभन्दा जनमत सङ्ग्रहमा लानुपर्ने धारणा राखे । एमसीसी अमेरिकाको इण्डो प्यासिफिक रणनीतिको अङ्ग भएको भन्दै यसलाई त्यतिकै पास गर्न नहुने उनको तर्क थियो । उनले सुनसरी जिल्लाभरमात्रै नभएर अहिले देशैभरी यस्तो कार्यक्रम चलिरहेको बताए ।
तस्वीरहरुः हाम्रो कोशी आवाज