धरानः धरानमा वैशाख ३० गते हुने निर्वाचनका लागि सोमबार ठूला दलले उम्मेद्वारी दर्ता गर्ने कार्यक्रम थियो । कार्यक्रममा नेपाली कांग्रेस, नेकपा माओवादी र नेकपा एकीकृत समाजवादी पार्टीका मेयर, उपमेयर साथै वडाध्यक्षहरुको उम्मेद्वारी दर्ता भएको छ ।
धरानस्थित सिंहदेवी चोकबाट शुरु भएको माससहितको रयाली धरानस्थित पब्लिक हाइस्कुलको मैदानमा आइपुगेको थियो । रयालीअघि नेपाली कांग्रेसबाट मेयरको टिकट पाएलगत्तै सिंहदेवीचोक पुगेका किशोर राई र उपमेयरको टिकट पाएका माओवादी केन्द्रका नेता अइन्द्रविक्रम बेघा एउटै मालामा उनिएका थिए । उनीहरुले एउटै मालामा उनिँदा र रयाली निकाल्दा केहीबेर रमिता समेत भएको थियो । यस्तै, अझ रोचक त के थियो भने कांग्रेसका कार्यकर्ताले माओवादीको र माओवादीका कार्यकर्ताले कांग्रेसको झन्डा समेत बोकेका थिए । त्यसपछि उनीहरु माससहित तामझामका साथ उम्मेद्वारी दर्ता गर्न पब्लिक हाइस्कुलको मैदानमा पुगेका थिए । उनीहरुले अन्य दलको भन्दा मास पनि बढी ल्याएका थिए ।
किशोर–अइन्द्र हाइहाइ, गठबन्धन एकता जिन्दावादजस्ता नारा लगाउँदै उनीहरु रयालीसहित हिँडेका थिए । कार्यक्रममा पत्रकारहरुसँग संक्षिप्त प्रतिक्रिया दिँदै मेयरका उम्मेद्वार किशोर राईले धरानको विकासका लागि गठबन्धन गरिएको र पाँच वर्षभित्रमा केही न केही विकास गरेर देखाउने प्रतिबद्धता व्यक्त गरे ।
कार्यक्रममा बोल्दै उपमेयरका उम्मेद्वार अइन्द्रविक्रम बेघाले धरानको विकास, समृद्धि साथै संविधानको रक्षा र मुलुकको रक्षाका लागि आफ्नो उम्मेद्वारी आएको बताए ।
कांग्रेसका केन्द्रीय नेता मिन विश्वकर्माले धराने जनताका लागि माथिल्लो तहमा पनि पहुँच राख्न सक्ने नेताहरु गठबन्धनबाट उम्मेद्वार बनेकोले यसपटक जिताएर देखाउन आग्रह गरे । उनले भने, ‘धरानको विकास, निर्माणलाई अघि बढाउने हो भने अहिले केन्द्रीय तहका नेताहरुसँग सिधै पहुँच राख्न सक्ने मेयर र उपमेयरका उम्मेद्वार आउनुभएको छ, उहाँहरुलाई जिताइदिनुहोस्, हामी धरानको विकास, समृद्धिलाई नढाँटीकन देखाइदिन्छौं ।’ यसअघि कांग्रेस एकढिक्का भएर धरानमा चुनाव लडेको र कांग्रेसले नै जितेको हुनाले यसपटक पनि एकढिक्का भएर चुनावमा मत हाल्न उनले आग्रह समेत गरे । तस्वीरहरुः हाम्रो कोशी आवाज, लक्ष्मण थापा