धरानः सूर्य नेपाल प्रिमियर गल्फ च्याम्पियनसीपको उपाधि शुक्रबहादुर राईले जितेका छन् ।
धराने प्रो शुक्रले पार ७२ को गोकर्ण फरेस्ट गल्फ रिसोर्टमा बिहीबार सम्पन्न चारदिने प्रतियोगितामा कुल १९ अन्डर २६९ खेले । अन्तिम दिन शुक्रले तीन अन्डर ६९ खेलेका थिए । उनले सिजनको तेस्रो उपाधि जितेका हुन् । उपाधिसँगै उनले दुई लाख ५० हजार रुपैयाँ पुरस्कार पाए ।
कुल १३ अन्डर दुई सय ७५ खेल्नुभएका निरज तामाङ दोस्रो बने । अन्तिम दिन दुई ओभर ७४ मा चित्त बुझाएका निरजले एक लाख ५५ हजार रुपैयाँ पुरस्कार पाए । १२ अन्डर दुई सय ७६ खेलेका घरेलु प्रो भुवन नगरकोटी तेस्रो बने । अन्तिम दिन दुई अन्डर ७० खेलेका भुवनले एक लाख १० हजार रुपैयाँ पुरस्कार पाए ।
एमेच्योरतर्फ वानचेन ढोन्डुप पहिलो बने । उनले कुल ११ अन्डर दुई सय ७७ स्कोर खेल्नुभएको थियो । सूर्य नेपाल गल्फ टुर अन्तर्गत वर्षको अन्तिम स्पर्धाको फाइनल चरणमा २२ प्रो र आठ एमेच्योरसहित ३० जनाले प्रतिस्पर्धा गरेका थिए । प्रतियोगिताको प्रारम्भिक चरणको ३६ होलमा ३४ प्रो र ११ जना एमेच्योरले भाग लिएका थिए । प्रोतर्फ शीर्ष २२ मा रहने गल्फरले आकर्षक नगद पुरस्कार प्राप्त गरे । एमेच्योरतर्फको विजेतालाई ट्रफी प्रदान गरिएको छ ।