धरानः साथीको नाममा फेक आइडी खोलेर अवैध कारोबार गरेको आरोपमा सुनसरीकी एक युवती पक्राउ परेकी छिन् । प्रहरीले सुनसरीको रामधुनी गाउँपालिका वडा नम्बर ४ घर भई हाल काठमाडौँको नयाँबस्ती बस्ने २० वर्षीया युनिसा भन्ने स्वस्तिका श्रेष्ठ पक्राउ गरेको जनाएको छ ।
युवतीले आफ्नै साथीको नाममा फेक आइडी खोलेर फेसबुक, इस्टाग्रामजस्ता सामाजिक सञ्जालहरुको दुरुपयोग गरी अष्ट्रेलियामा रहेकी केटी साथीको नाममा फेक अकाउन्ट खोलेर गलत कार्य गरेको आरोपमा पक्राउ परेकी हुन् । उनले साथीको फोटो, स्टाटस समेत अपलोड गरेर केटा साथीहरुलाई म्यासेन्जरमार्फत विभिन्न बहाना बनाई रकम माग्ने गरेको खुलेको प्रहरीले जनाएको छ । सो सम्बन्धमा साइबर ब्यूरोमा उजुरी परेपछि श्रेष्ठ पक्राउ गरेकी हुन् । उनले आफनो बैंक तथा ईसेवा वालेटहरुमा रकम पठाउन लगाउँदै रकम लिएर ठगी गर्ने गरेको पाइएको प्रहरीले जनाएको छ ।
अष्ट्रेलियामा बस्ने केटी साथीको नाममा फेसबुक आइडी बनाएर युनिसाले केटा साथी बनाएर ठगी गरेको उपत्यका अपराध अनुसन्धान कार्यालयका एसपी सोमेन्द्रसिंह राठौरले जानकारी दिए । आरोपीलाई थप अनुसन्धान र कारबाही गर्न अपराध अनुसन्धान कार्यालयले साइबर ब्यूरोमा पठाएको छ ।