धरानः स्मार्ट गाइज समूहले खुवालुङसम्मको पदयात्रा सम्पन्न गरेको छ ।
‘हिँड्छ युवा, बढ्छ युवा’ नाराका साथ यो समूहले शनिबार त्रिवेणीमा अवस्थित खुवालुङसम्म पदयात्रा गरेको हो । खुवालुङलाई किराँतीहरुको आस्थाको केन्द्रको रुपमा पनि मानिने गरेको छ ।
समूहका सदस्य वरदान भारत राईका अनुसार धरानदेखि बराहक्षेत्र हुँदै खुवालुङ अवस्थित स्थल त्रिवेणीसम्म पदयात्रा गरिएको थियो । युवाको समूहबाट निर्माण भएको स्मार्ट गाइज समूहले भविष्यमा सामाजिक कार्यमा अग्रसर रही सामाजिक संस्थाको रुपमा समूहलाई स्थापित गरेर लैजाने राईले बताए । उनका अनुसार समूहले सिर्जनशील युवाहरुलाई समाविष्ट, प्रोत्साहन गर्दै युवाहरूको नेतृत्व विकाव कार्यमा समेत निरन्तरता दिनेछ ।
युवाहरु वैचारिक र शारीरिक तवरले पनि स्वास्थ्य हुनुपर्छ भन्ने मान्यतासहित पदयात्रा आयोजना गर्नुको उद्देश्य रहेको समूहका सदस्य नरेन्द्र राईले बताए । दोस्रो हप्ताको शनिबार सरसफाई क्याम्पिनिङसहित समूहले धनकुटा जिल्लाको ऐतिहासिकगढी साँगुरीगढीसम्म पदयात्रा गर्ने समेत उनले जानकारी गराए ।