धरानः वैशाखे पूर्णे अर्थात् उभौली चाडको रौनक किराती समुदाय बाहुल्य क्षेत्रहरूमा बढेको छ ।
उभौलीलाई राईहरुले साकेला उभौली, लिम्बूहरूले यक्वा तङनाम, याक्खाहरूले युच्याङ र सुनुवार जातिले फोल ष्याँदर भनी मनाउने गरेका छन् । राईहरूले भने बैशाखे पूर्णेको दिनदेखि कम्तीमा १५ दिनसम्म चोक चोकमा साकेला नाच्ने गरेका छन् ।
यसैबीच शनिबार भानुचोकमा नाचियो साकेला । विशेषतः किरात समुदायको महान् चाड साकेला उभौलीका अवसरमा भानुचोकमा साकेला उभौली पर्व मनाइएको हो । यस वर्षपनि ‘कोशी प्रदेश खारेजीको माग राख्दै किरात प्रदेशलाई जोडदाररुपमा उठाइयो ।
साकेला उभौली सृष्टिकालदेखि प्रकृति र मानव उत्पत्तिको कथा बोकेको किरात समुदायमा मुन्धुमको महत्वपूर्ण स्थान रहेको छ । मुन्धुम शब्दको अर्थ ‘मु’ भनेको आगो र ‘दुम’ भनेको हिँड्नु हो । यसको किरात समुदायमा मुन्धुमको अर्थ उज्यालोतिर लाग्नु भन्ने हुन्छ । यस अर्थले सम्पूर्ण किरात समुदाय उज्यालोतिर अर्थात् राम्रो मार्गतिर जाने हुन्छ । मौलिक साँस्कृतिक पहिरनमा युवायुवती, केटाकेटी र वृद्धवृद्धाहरू साकेला नाच्न लालायित हुन्छन् । ढोल र झ्याम्टा गुञ्जिन थालेपछि अब खेतीपाती गर्ने समय शुरु भएको संकेत पनि भएको हो ।
यायोख्खा सुनसरीको अनुसार उभौली पर्व आउँदो जेठ ६ गते धरान १७ स्थित साकेला पार्कमा समापन हुनेछ ।
तस्वीरहरुः लक्ष्मण थापा