धरानः राष्ट्रिय मानव अधिकार आयोगले डेंगु नियन्त्रणलाई प्राथमिकतामा राखेर काम गर्न सरकारको ध्यानाकर्षण गराएको छ ।
आयोगका प्रवक्ता टीकाराम पोखरेलले बुधबार विज्ञप्ति जारी गर्दै डेंगुको संक्रमण बढ्दै जाँदा महामारीको रुप लिनसक्ने भन्दै त्यसतर्फ सचेत गराएका हुन् ।
विज्ञप्तिमा भनिएको छ, ‘नागरिकको स्वास्थ्यसम्बन्धी हकको संरक्षण गर्न एवं जीवनको अधिकार सुनिश्चित गर्न, डेंगु फैलाउने लामखुट्टेको लार्भा खोज्ने र नष्ट गर्ने अभियानमा पर्याप्त जनशक्ति परिचालन गर्ने कार्यमा तीनै तहका सरकार बिच प्रभावकारी समन्वय र सहकार्य गर्न तथा डेंगु नियन्त्रण र रोकथामका लागि सरसफाई, जनचेतनालगायतका कार्यहरूलाई प्राथमिकताका साथ अगाडि बढाउन आयोग संघीय सरकार, प्रदेश सरकार र स्थानीय तहलाई आग्रह गर्दछ।’
डेंगु संक्रमण फैलिन थालेपछि नियन्त्रणका लागि सरसफाई गर्नुका साथै पानीका खाल्डाखुल्टी पुरिदैछ । आयोगले जनस्वास्थ्य सेवा ऐन, २०७५ को दफा ९१६० ले प्रत्येक स्वास्थ्य संस्थाले कुनै पनि रोगको सङ्क्रमण नहुने र रोक्नेतर्फ आवश्यक सुरक्षात्मक उपायको अवलम्बन गर्नुपर्ने व्यवस्था गरेको उल्लेख गर्दै त्यसतर्फ सरकारले ध्यान दिनुपर्ने जनाएको छ ।
आयोगले डेंगुको संक्रमण बढ्दै जाँदा पछिल्ला एक महिनामा मात्रै संक्रमितको संख्या १२ हजार नाघिसकेको र आठजनाको ज्यान समेत गइसकेको भन्दै त्यसतर्फ सरकारको ध्यानाकर्षण गराएको हो ।