धरानः धरानमा खानेपानी बोर्डले खानेपानीको महसुल वृद्धि गरेको विरोधमा १० दलले आन्दोलन चर्काइरहेका बेला एक ग्राहकको घरमा भने खाने पानीको बिल नै एक महिनाको ४९ लाख ९९ हजार २ सय रुपैयाँ आएको छ ।
धरान-१५ का उपभोक्ता सितादेवी डाँगीको निजी धाराको बिल झन्डै ५० लाख आएको हो । खानेपानी बोर्डले गत साउन १२ गते डाँगीको घरमा बिल पठाएको थियो । उक्त बिलमा खानेपानीको खपत युनिट ९९ हजार ९ सय ९९ सय रहेको छ । यस्तो हुनुमा मिटर उल्टो घुमेको खानेपानी बोर्डका प्रमुख राजु पोखरेलले बताए । ‘यो केही होइन मिटर उल्टो घुमेको हो । हामीले यो समस्या सर्ट आउट गरिसकेका छौँ,’ पोखरेलले भने । यता, उक्त बिल भने सामाजिक सञ्जाल फेसबुकमा भाइरल बनेको छ । सामाजिक सञ्जालमा एउटै बिलबाट एडिबीको ऋण तिर्ने गरी खानेपानी बोर्डले बिल काटेको हुनसक्ने भन्दै विरोध गरिएको छ ।