धरानः धरानमा लाउरेको कन्सर्ट आयोजना भएको छ ।
धरानमा जारी औद्योगिक व्यापार मेला तथा जुत्ता–चप्पल मेलामा चर्चित रयापर आशिष राना (लाउरे) को कन्सर्ट आयोजना भएको हो । कन्सर्टमा धरानका युवायुवतीको निकै भिड लागेको थियो ।
कन्सर्टमा ८ हजार बढी युवायुवतीको उपस्थिति रहेको मेला संयोजक शिवराज श्रेष्ठले जानकारी दिए । ९ बजेतिर मात्र लाउरे स्टेज उक्लेका थिए । धराने दर्शकको हुटिङ र जोश देखेर लाउरे पनि मख्ख थिए । ‘धरान र पोखरा जोशिलो लाग्छ’, स्टेजमै उनले भने, ‘धेरै माया र सपोर्ट पाउँदा धेरै खुशी लागेको छ ।’
उनले आधा दर्जन बढी गीत गाएर धरानेलाई उचाले । धराने पनि धूलो उडाउँदै नाचेका थिए । आज मेलामा राजेशपायल राई आउने भएका छन् । मेला भोलि शनिबारसम्म चल्नेछ ।