धरानः प्रधानमन्त्री केपी शर्मा ओलीले छुटेको भूभाग समेटेर नक्सा संशोधन गर्ने विषय सबैको साझा जसको विषय भएको बताएका छन् ।
बुधबार प्रतिनिधिसभामा सम्बोधन गर्दै ओलीले संविधान संशोधन र अतिक्रमित भूमी फिर्ता गर्ने विषय आम नेपालीको साझा जसको विषय भएको बताएका हुन् ।
नक्सा संशोधनको विषयमा मंगलबार संसदमा देखिएको एकता राष्ट्रिय एकताका पक्षमा असाधरण भएको भन्दै ओलीले खुशी व्यक्त गरे ।
‘यस मामिलामा हाम्रो संसद एक जुट छ । साझा चुनौतीहरुको सम्बोधन गर्न एकताबद्ध भएर अघि बढ्न सक्छौं । संसदमा रहेका सबै राजनीतिक दल र मानीय ज्यूहरुप्रति हार्दिक धन्यवाद तथा आभर व्यक्त गर्दछु ।’
भौगोलिक अखण्डता कायम गर्नका लागि सबै राजनीतिक दल जनताको भावनाअनुसार अगाडि बढ्नुपर्ने आवश्यकता रहेको प्रधानमन्त्रीको भनाइ थियो । संसदीय प्रणाली र बहुदलीय व्यवस्थामा राष्ट्रिय एकता विरलै देखा पर्ने भए पनि नेपालका राजनीतिक दलहरूले भने पटकपटक यसरी राष्ट्रिय एकताको प्रदर्शन गरेका देखाएको प्रधानमन्त्रीले दाबी गरे ।
बुधबार संसदमा विनियोजन बजेटमाथि उठेका प्रश्नको जवाफ दिने क्रममा प्रधानमन्त्री ओलीले भौगोलिक अखण्डता र आफ्नो भूमिमा हक स्थापित गर्ने साझा प्रयास भएको बताए । ‘पूर्खाले यो देश लडेर बनाएका हुन्, बचाएका हुन् । आज हामी अडे मात्र हाम्रो भौगोलिक अखण्डता स्थापित गनर्ज सक्छौं,’ उनले भने, ‘अड्ने कुरामा राष्ट्र एक देखिएको छ र संसदले जनभावना मुखरित गरेको छ ।’