फोटोः गुगल

ताप्लेजुङः ताप्लेजुङको फुङलिङ नगरपालिका वडा नं २ अन्र्तगत मेरिङ्देन गाउँपालिका वडा नं २ खाम्लुङ बजार नजिकै ट्रकले विद्युतको नाङगो तार छुँदा नजिकै रहेको ट्याक्सी चालकको आइतबार मृत्यु भएको छ ।
ट्रकका चालकलाई गम्भीर घाइते अवस्थामा उद्दार गरी उपचारका लागि ताप्लेजुङ जिल्ला अस्पताल उपचार भइरहेको छ । जिल्ला प्रहरी कार्यालय ताप्लेजुङका प्रहरी प्रमुख डिएसपी महेन्द्रकुमार श्रेष्ठका अनुसार मृत्यु हुनेमा मे१च ३०८१ नम्बरको ट्याक्सी चालक ताप्लेजुङको दोखु घर भएका २७ वर्षीय विकास मुखिया रहेका छन् ।
मे१ख १८६५ नम्बरको ट्रक चालक पाँचथरको भारपाका अन्दाजी ३५ वर्षीय अमृत श्रेष्ठलाई गम्भीर अवस्थामा उपचारका लागि ताप्लेजुङ जिल्ला अस्पतालमा उपचार भइरहेको श्रेष्ठले जानकारी दिए । प्रहरीका अनुसार दोभान बजार सामान पुरयाएर झापाको बिर्तामोडतर्फ अघि बढेको ट्रकले तलसम्म लत्रेको विद्युतको नांगो तारलाई छोएको थियो ।
सोही कारण घाइते भई त्यहीँ लडेका अमृतले गाडी अघि बढाउन सकेनन् । साइड दिएर बसेको ट्याक्सी चालक मुखिया गाडीबाट ओर्लिए र गाडी किन अघि नबढेको भनेर यात्रुलाई गाडीमै छाडी ट्रक भएतर्फ अघि बढे । करेन्ट लागेर घाइते भई गाडीमै लडेका अमृतलाई छोएका विकासलाई करेन्टले समात्यो र उनको त्यहीँ मृत्यु भयो । जिल्ला प्रहरी प्रमुख श्रेष्ठले घटनाको अनुसन्धानका लागि प्रहरी निरीक्षक मोहन पोखरेलको टोली घटनास्थलतर्फ परिचालित भएको जानकारी दिए ।