धरानः नेपालमा लक्षणसहितका कोरोना संक्रमित थपिन थालेका छन् । लकडाउन अन्त्य भएसँगै नेपालमा कोरोना संक्रमितको संख्या पनि बढिरहेको छ। संक्रमितको संख्यासँगै नेपालमा लक्षणसहितका र आइसियु चाहिने संक्रमितको संख्या पनि बढ्दै गएको छ। यसैक्रममा देशभरमा ६६ जना संक्रमितले आइसियुमा उपचार गराइरहनुपरेको स्वास्थ्य मन्त्रालयले जनाएको छ ।
संक्रमितको संख्या बढ्न थालेपछि मन्त्रालयले थप २४० आईसीयू थप्ने तयारी गरेको मन्त्रालयका प्रवक्ता डा. जोगेश्वर गौतमले जानकारी दिए । मन्त्रालयले केहीदिनदेखि संक्रमितको उपचार आईसीयू र भेन्टिलेटरमा राखेर गर्नुपर्ने अवस्था आएको जनाएको छ । ‘देशरभका ६६ जना संक्रमित आईसीयूमा रहेका छन् भने तीन जनाको भेन्टिलेटमा उपचार गराइरहनुभएको परेको छ ।’ उनले भने ।
उनले विदेशबाट फर्किएका मात्रै होइनन् पछिल्लो समय समुदायस्तरमा समेत संक्रमण देखिएको बताए । लकडाउन खुलेसँगै समुदायस्तरमा समेत संक्रमण देखिन थालेको उनको भनाइ छ । देशभर कोरोना संक्रमितको उपचार लागि १ हजार ७०२ आइसियु र ९०० भेन्टिलेटरको व्यवस्था रहेको स्वास्थ्य मन्त्रालयको तथ्यांक छ।
स्वास्थ्य तथा जनसंख्या मन्त्रालयका अनुसार प्रदेश १ मा लेबल १ अस्पतालका लागि १० आइसियु बेड र १० वटा भेन्टिलेटर छुट्याइएको छ। त्यसका लागि पाँच जना क्रिटिकल केयर तालिम प्राप्त कर्मचारीको व्यवस्था गरिएको छ।