धरानः धरान–८ स्थित तीनकुनेमा भएको दुर्घटनामा मृत्यु भएकी महिलाको पहिचान खुलेको छ ।
पूर्वाञ्चल इन्जिनियर क्याम्पस अगाडि भएको दुर्घटनामा एक महिलाको मृत्यु भएको थियो । मृतक महिलाको पहिचान खुल्न सकेको थिएन । इलाका प्रहरी कार्यालय धरानका डिएसपी ज्ञानेन्द्र बस्नेतले समाचार सार्वजनिक भएपछि उनको पहिचान खुलेको जानकारी दिए । उनी धनकुटा पाख्रिबास–५ घर भई हाल मोरङको बेलबारी–७ बस्ने वर्ष ८१ की लक्ष्मीमाया तामाङ रहेको उनले जानकारी दिए ।
गत १६ गते साढे ७ बजे को८प ९३०२ नम्बरको मोटरसाइकलले ठक्कर दिई घाइते भएकी उनको बीपी प्रतिष्ठानमा १७ गते मृत्यु भएको थियो । आफन्तको खोजतलासको लागि सहयोग माग गरिएको र समाचार सार्वजनिक भइसकेपछि मृतक महिलाको छोरा वर्ष ५५ को चन्द्रबहादुर तामाङले घटना बारेमा जानकारी पाई शवको जिम्मा लिइसकेको उनले जानकारी दिए ।
इटहरीबाट धरान आउँदै गरेका धरान–१७ बस्ने ३० वर्षीय राम पौडेलले चलाएको मोटरसाइकलले उनलाई ठक्कर दिएको बताइएको छ । चालक पौडेललाई नियन्त्रणमा लिएर ज्यान मुद्दामा अनुसन्धान भइरहेको उनले जानकारी दिए ।