धरानः धरानमा एकैदिन ६४ जनामा कोरोना देखिएको छ ।
धरान उपमहानगरपालिकाका स्वास्थ्य महाशाखाका प्रमुख उमेश मेहताले धरानमा अहिलेसम्मकै धेरै संख्यामा कोरोना पोजेटिभ देखिएको बताए ।
‘६२ जना धरान–१३ स्थित फुस्रे आर्मी क्याम्पका सैनिक र सैनिकको परिवार रहेका छन्’, उनले भने, ‘अन्य दुईजना प्रहरी छन् ।’
उनका अनुसार संक्रमित हुनेमा एकजना दुई वर्षको बालिका र ४२ वर्षसम्म उमेर समूहका छन् । गत साउन १७ गते स्वाब लिइएको र १४२ मध्ये यतिका संख्यामा कोरोना पोजेटिभ देखिएको हो । त्यसमा धरानस्थित इलाका प्रहरी कार्यालयका दुईजना प्रहरीमा पनि कोरोना देखिएको छ । ‘एकजना प्रहरी र एकजना सूचनाका हवल्दार रहेको पाइएको छ’, उनले भने । योसँगै धरानमा संक्रमितको संख्या २७१ पुगेको उनले जानकारी दिए । धरानमा मात्रै ११० जनाभन्दा बढी सैनिक रहेका छन् । यसअघि पनि १२ जनाभन्दा बढी सैनिकमा कोरोना पुष्टि भइसकेको छ । धरानमा मात्रै ११० जनाभन्दा बढी सैनिक रहेका र यसअघि पनि १२ जनाभन्दा बढी सैनिकमा कोरोना पुष्टि भइसकेको उनले जानकारी दिए ।