धरानः धरानस्थित बीपी कोइराला स्वास्थ्य विज्ञान प्रतिष्ठान धरानमा आज थप एकजना मोरङका कोरोना संक्रमितको मृत्यु भएको छ ।
प्रतिष्ठानको कोभिड १९ अस्पतालमा उपचाररत मोरङको सुनवर्षी ७ का ६८ वर्षीय पुरुषको मंगलबार बिहान ३ः०० बजे मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए ।
कोरोना संक्रमण पुष्टि भएपछि विराटनगरको नोवेल शिक्षण अस्पतालले आइसिय्मा उपचाररत वृद्धलाई थप उपचारका लागि असोज १० गते प्रतिष्ठान रेफर गरेको थियो ।
प्रतिष्ठानको कोभिड अस्पतालको भेन्टिलेटरमा राखेर उपचार थालिए पनि संक्रमित वृद्धलाई बचाउन नसकिएको डा. सापकोटाले जानकारी दिए । पीसीआर परीक्षण गराउँदा वृद्धमा असोज ५ गते कोरोना पृष्टि भएको थियो । नोबेलमा रहँदा स्वास्थ्य अवस्था थप गम्भीर बन्दै गएपछि प्रतिष्ठानमा रेफर गरिएको नोबेलले जनाएको छ ।
डा. सापकोटाले मृतकमा ज्वरो, खोकी र श्वासप्रश्वास सम्बन्धी नयाँ समस्या देखिएको जानकारी दिए । उनका अनुसार उच्च रक्तचाप, मधुमेह र मृगौलाको पुरानै समस्या पनि थियो । वृद्धले मृगौलाको नियमित डाइलासिस गराइरहेको सापकोटाको भनाइ छ । शवको व्यवस्थापन स्वास्थ्य मापदण्डअनुसार भइरहेको उनले जानकारी दिए ।
यस्तै, कोशी अस्पताल विराटनगरको आइसोलेसनमा एकजना कोरोना संक्रमित पुरुषको मृत्यु भएको छ ।
सुनसरीको दुहवी नगरपालिका–५ का ६० वर्षीय पुरुषको मृत्यु भएको हो । उनलाई अस्पताल पुरयाएलगत्तै केहीबेरमै मृत्यु भएको अस्पतालले जनाएको छ । अस्पतालका आइसोलेसन संयोजक एवं वरिष्ठ फिजिसियन डा. लक्ष्मीनारायण यादवले ती वृद्धमा ज्वरो, खोकी र श्वासप्रश्वासमा समस्या देखिएको भन्दै पुरुषलाई सोमबार दिउँसो २ः४५ बजे अस्पताल लगिएको थियो । उनको सोमबार दिउँसो ३ः०५ बजे मृत्यु भएको हो ।