धरानः धरानमा भएको दुर्घटनामा एकको मृत्यु भएको छ ।
धरान–४ स्थित कोशी लोकमार्ग (भेडेटार तल) मा ट्रकले च्यापेर सहचालकको ज्यान गएको हो । इटहरी बस्ने वर्ष ३० को विशाल खड्काको घटनास्थलमै ज्यान गएको हो । घटना शुक्रबार बिहानको हो ।
भोजपुरबाट इटहरीतर्फ जाँदै गरेको ना६ख ६४५१ नम्बरको ट्रक दुर्घटनामा परेको इलाका प्रहरी कार्यालय धरानका डिएसपी ज्ञानेन्द्रबहादुर बस्नेतले जानकारी दिए । ट्रकले च्यापेर उनको मृत्यु भएको उनले जानकारी दिए । ‘ट्रकले च्यापेको अवस्थामा शव बाहिर निकालिसकिएको छ’, उनले भने । ब्रेक फेल भएर दुर्घटना भएको हो । बिहान ४ बजेतिर दुर्घटनामा हुँदा ट्रक सडकबाट ५० मिटर तल खसेको थियो । ट्रकका चालक सुन्दरहरैँचा नगरपालिका–११ का २५ वर्षीय सुनिलकुमार भगतलाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ ।