विराटनगरः विराटनगर–१८ का २३ वर्षीय सुभाष कामतलाई बन्धक बनाई परिवारसँग १० लाख फिरौती रकम माग गर्ने तीनजनालाई जिल्ला प्रहरी कार्यालय मोरङले पक्राउ गरेको छ ।
पक्राउ पर्नेहरुमा विराटनगर महानगरपालिका–२० का २० वर्षीय रोहित मण्डल, विराटनगर–१६ का अजय यादव र बिराटनगर–६ की २८ वर्षीया सन्ध्या शर्मा रहेका छन् । उनीहरुले शनिबार दिउँसोदेखि कामतलाई बन्धक बनाएको र फिरौतीबापत परिवारसँग १० लाख रकम माग गरेको भन्ने सूचनाका आधारमा जिल्ला प्रहरी कार्यालय मोरङबाट खटिएको प्रहरी टोलीले सूचना पाएको दुई घण्टाभित्रै कामतलाई विराटनगर–६ बाट सकुशल उद्दार गरेको हो ।
मानिस बन्धक बनाएको आरोपमा पक्राउ परेका उनीहरुको सम्बन्धमा थप अनुसन्धान भइरहेको जिल्ला प्रहरी कार्यालय मोरङका प्रहरी नायव उपरीक्षक बिपिन रेग्मीले जानकारी दिए ।