ताप्लेजुङः ताप्लेजुङको मेरिङदेन गाउँपालिका–३ स्थित दोभान बजारमा मंगलबार बिहानबाट फैलिएको आगोले ५५ घर खरानी भएको छ । जलेका सबै घर कामै नदिने भएका छन् ।
जिल्ला प्रशासन कार्यालय ताप्लेजुङकी सहायक प्रमुख जिल्ला अधिकारी गायत्रा अधिकारीका अनुसार कपडा पसल, कृषि सामग्रीका पसल, किराना पसलहरु तथा भण्डारण गरिएका अलैंचीजस्ता कृषि उत्पादन जलेर नष्ट भएका छन् ।
बिहानको समयमा मानिसहरू ब्युँझिसकेको र आगो लाग्नेबित्तिकै बाहिर निस्कन पाएकाले मानवीय क्षति हुनबाट जोगिएको उनको भनाइ छ । दोभान जिल्लाकै दोस्रो ठूलो व्यापारिक केन्द्र हो । सदरमुकामबाट १७ किमि दूरीमा रहेको सो बजारमा ८५ वटा घर थिए ।
आगो पूरै नियन्त्रणमा आइनसकेको उनले जानकारी दिइन् । सदरमुकाम फुङलिङबाट आएको दमकल र एक्स्काभेटरको सहायताले बजारमा थप आगो फैलिन रोकिएको थियो । आगलागी फैलन नदिन डोजरले कच्ची घरहरू भत्काएको थियो ।
प्रहरी नायब उपरीक्षक बालनरसिंह राणाका अनुसार बिहान ९ बजेतिर एक घरबाट सल्किएको आगो बस्तीभरि फैलिएको हो । उनले भोला पौडेलको घरबाट आगो सल्किएको जानकारी दिए । ‘खासमा पौडेलको घरमा रहेको कपडा पसलमा बिजुली सर्ट भएर आगो लागेको पाइयो’, उनले भने, ‘बजारको वस्ती बाक्लै भएको र जस्तापाताले छाएको घर हुनाले आगो चाँडो फैलियो ।’ क्षतिको पूर्ण विवरण भने आउन बाँकी रहेको प्रहरीले जनाएको छ ।