विराटनगरः राम्रो काममा लगाइदिने भन्दै महिलालाई सीमा कटाउन लागेपछि प्रहरीले दुईजना पुरुषलाई समातेको छ ।
विराटनगरको सीमा हुँदै दुई नेपाली महिलालाई भारततर्फ लैजादैं गरेका काजी तामाङ र प्रेमबहादुर मगरलाई पक्राउ गरिएको प्रहरीले जनाएको छ ।
सिन्धुपाल्चोकको जुगल गाउँपालिका २ की २३ र ३२ वर्षीया दुई महिलालाई विराटनगर महानगरपालिका १६ दक्षिण गेट हुँदै भारत लैजाने क्रममा उनीहरुलाई पक्राउ गरेको हो । मोरङ प्रहरीका प्रवक्ता प्रहरी नायब उपरीक्षक मानबहादुर राईले दुवैजनालाई मानव बेचबिखन मुद्दा चलाउन अदालतबाट म्याद थप गरी अनुसन्धान अघि बढाइएको जानकारी दिए ।
तामाङ थरका दुवै महिलाले भारतमा पुगेर राम्रो कमाई हुने भन्दै आफूहरुलाई काठमाडौंदेखि बस चढाएर विराटनगर ल्याइएको बताएका छन् । विराटनगर बसपार्कमा लिन पुगेका उनीहरुलाई काजीले एकरात लजमा राखेर फागुन २१ गते भारत पुरयाउन खोजेको पाइएको उनको भनाइ छ ।