सुनसरीः सुनसरीको इनरुवा नगरपालिका–८ डुम्राहा बस्ने ६० वर्षीया खट्रो उरावको मोटरसाइकलको ठक्करबाट मृत्यु भएको छ ।
बुधबार बेलुका साढे ५ बजे भोक्राहा नरसिङ– ४स्थित पूर्व–पश्चिम लोकमार्गमा स४प ५७१३ नम्बरको मोटरसाईकलले ठक्कर दिँदा घाइते भएकी उरावको जिल्ला अस्पताल इनरुवामा उपचारको क्रममा साँझ साढे ६ बजे मृत्यु भएको छ ।
सो दुर्घटनामा मोटरसाइकल चालक सप्तरी कैलाडी ६ बस्ने ५० वर्षीय शिवनारायण मण्डलसमेत घाइते भई गोल्डेन अस्पताल विराटगरमा उपचार भइरहेको जिल्ला प्रहरी कार्यालय सुनसरीले जनाएको छ ।
यसैबीच दमक नगरपालिका–१ श्रेष्ठ चौकस्थितमा मे१त ६०३२ नम्बरको ट्याक्टरबाट लडी सह–चालक इलामका २१ वर्षीय वसन्त राईको मृत्यु भएको छ ।
बुधबार दिउँसो साढे १ बजे ट्याक्टरबाट खसी घाइते भएका राईको उपचारको लागि लाइफ लाइन अस्पताल दमक पुग्नासाथ मृत्यु भएको इलाका प्रहरी कार्यालय दमकले जनाएको छ । ट्याक्टर र चालक झापा दमक–३ का कैलाश तामाङ प्रहरीको नियन्त्रणमा प्रदेश १ प्रहरी कार्यालय विराटनगरका सूचना समन्वय अधिकृत प्रहरी नायव उपरीक्षक विपीन रेग्मीले जानकारी दिए ।