धरानः नक्कली शैक्षिक प्रमाणपत्र पेश गरेर एमबिबिएस पढेका र डाक्टर बनेका सात जनालाई प्रहरीले पक्राउ गरेको छ।
एसएलसीको नक्कली सर्टिफिकेट पेश गरेर डाक्टर बनेका सातजनालाई पक्राउ गरिएको प्रहरीले जनाएको छ।
पक्राउ परेका उनीहरुलाई साेमबार सीआईबीले पत्रकार सम्मेलन गरी सार्वजनिक गरेको छ।
पक्राउ पर्नेमा सप्तरीको बिष्णुपुरा गाउँपालिका-२ का २८ वर्षीय मोहम्मद सिद्दिक, महोत्तरी सरपल्लो–६ का २९ वर्षीय सुभाष प्रसाद साह, धनुषा सबैला-२ का २८ वर्षीय मोहम्मद साहिद राजा, मनाङको साविक चामे गाविस-५ का ३१ वर्षीय दिपेन्द्र गौतम, सप्तरीको शंकरपुरा-१ का ३१ वर्षीय अखिलेशकुमार देव, महोत्तरीको मनरा-५ की २७ वर्षीया पल्लवी सिंह र ललितपुर सानेपाका २९ वर्षीय फराज हुसेन खाँ रहेका छन्।
नक्कली प्रमाणपत्र पेश गरेर चिकित्सक बनेको आशंकामा उनीहरुलाई प्रहरीले फरक–फरक स्थानबाट पक्राउ गरेको हाे। उनीहरुलाई विभिन्न स्थानबाट पक्राउ गरेर काठमाडौं ल्याइएको सीआईबीले जनाएको छ।
उनीहरुले नक्कली प्रमाण पत्र पेश गरेर मेडिकल काउन्सिलको प्रमाणपत्र लिएकाे अनुसन्धानका क्रममा देखिएकाे छ। आरोपीहरुले बंगलादेशमा मेडिकल शिक्षा अध्ययनका लागि एसएलसीको मार्कसिटमा आवश्यक न्यूनतम योग्यता नपुग्ने भएपछि नाम, जन्ममिति, प्राप्तांकलगायतका विवरण सच्याएर मेडिकल काउन्सिलबाट प्रमाणपत्र लिएको अनुसन्धानका क्रममा खुलेको छ।
पक्राउ परेका मोहम्मद सिद्दिक न्यूरो हस्पिटल विराटनगरमा कार्यरत थिए भने दीपेन्द्र गौतम चौरजहारी अस्पताल रुकुम पश्चिममा, मोहम्मद साहिद राजा दीर्घायू गुरु हस्पिटल चाबहिल र शुभाष साह जनकपुर चिल्ड्रन हस्पिटल धनुषामा कार्यरत रहेका सीआईबीले जनाएको छ।