धरानः संघीय सरकारले परिस्थिति हेरेर जिल्लाहरुले १५ दिनसम्म निषेधाज्ञा जारी गर्न सक्ने जनाएको छ । सोमबार बसेको मन्त्रिपरिषद बैठकले जिल्लाहरुले आवश्यकता अनुसार १५ दिनसम्म निषेधाज्ञा जारी गर्न सक्ने निर्णय गरेको हो ।
‘१५ दिन नै गर्नुपर्छ भन्ने छैन । कुनै जिल्लाले तीनदिन पनि गर्न सक्छन् । कुनैले सातदिन पनि गर्न सक्ने भए । १५ दिन अधिकतम सीमा हो । १५ दिनसम्म निषेधाज्ञा जारी गर्ने जिल्लालाई अधिकार दिइएको हो,’ संघीय मामिला तथा सामान्य प्रशासन मन्त्री गणेशसिंह ठगुन्नाले भने ।
पहाडी, हिमाली जिल्लामा सक्रिय संक्रमित २ सय र काठमाडौं उपत्यका र तराईमा सक्रिय संक्रमित संख्या ५ सय पुगेपछि सम्बन्धित जिल्लाका स्थानीय प्रशासनले निषेधाज्ञा जारी गर्न सक्नेछन् । तर कम्तीमा १५ दिन निषेधाज्ञा लागु गर्नुपर्ने हुन्छ ।
काठमाडौं, भक्तपुर र ललितपुरका प्रमुख जिल्ला अधिकारीहरूले वैशाख १६ गतेदेखि २२ गतेसम्म एक साता मात्रै निषेधाज्ञा लागु गर्ने गरी सोमबार नै निर्णय गरेका थिए । मन्त्रिपरिषद निर्णयअनुसार अब यी जिल्लामा पनि कम्तीमा १५ दिन निधेषाज्ञा लागु हुनेछन् ।
‘सबै जिल्लामा निषेधाज्ञा लागु गर्नुपर्ने छैन । ११–१२ जिल्लामा निषेधाज्ञा लागु गर्नुपर्ने हुन्छ । कहाँ निषेधाज्ञा गर्ने स्थानीय प्रशासनले नै अध्ययन गरेर निषेधाज्ञा आदेश गर्छ,’ उनले भने ।
स्थानीय प्रशासनले अकस्मात निषेधाज्ञा जारी गर्नका लागि सर्वसाधारणलाई केही दिन समय दिनुपर्ने र निषेधाज्ञा जारी गर्न पाइनेछ । ‘निषेधाज्ञा गर्दा केही समय दिएर गर्नुपर्छ । मानिसहरू आफ्ना ठाउँमा जानुपर्ने छ भने जान्छन्,’ उनले भने ।
निषेधाज्ञा जारी भएका जिल्लाहरूमा सार्वजनिक र निजी सवारी साधन चल्न पाउने छैनन् । अत्यावश्यक सेवाका सवारी भने चल्नेछन् । पासवाला र विमानस्थल जाने सवारीलाई चल्न दिइनेछ ।
नेपाल भित्रिने नेपालीलाई सरकारले सीमामा पिसीआर परीक्षणको व्यवस्थापन गर्ने र होल्डिङ सेन्टरमा राख्ने भएको छ । तर विदेशीका हकमा पिसीआर रिपोर्ट नेगेटिभ लिएर आएका छन् भने पनि अनिवार्य रूपमा १० दिन क्वारेन्टिन बस्नुपर्नेछ ।