धरानः सरकारले एक करोड खोप किन्ने तयारी थालेको जनाएको छ ।
स्वास्थ्य पत्रकार मञ्चले आयोजना गरेको भर्चुअल कार्यक्रमलाई सम्बोधन गर्दै परराष्ट्रमन्त्री प्रदीप ज्ञवालीले खोप खरिद प्रक्रियामा रहेको बताए ।
खोप खरीदका लागि अर्थ मन्त्रालयले रु.३६ अर्बको स्रोत सुनिश्चित गरेर चीनसँग ५० लाख र अमेरिकासँग ५० लाख गरी एक करोड डोज खरीदको योजना रहेको उनले सुनाए ।
‘एक हप्तादेखि १० दिनमै तपाइँहरूले ब्रेक थ्रु भएको देख्नुहुनेछ । यो वर्षभित्रै लक्षित बर्गलाई खोप लगाउनेछौं ।’
अनुदानमा आउने खोपको भर पर्दा लामो समय लाग्ने भएकाले सरकारले खोप खरीदमा जोड दिएको उनको भनाइ छ । पहिलो डोज कोभिशिल्ड खोप लगाएका ६५ वर्षभन्दा माथिका १४ लाख नागरिकका लागि पहिलो विकल्पका रुपमा भारतसँग उच्च तहमा कोभिशिल्ड खोप उपलब्ध गराउन आग्रह गरिएको छ । मन्त्री ज्ञवालीका अनुसार उच्च तहमा कुरा गरेर १७ लाख डोज खोप माग गरिएको छ ।
खोप भित्राउनका लागि अमेरिका, बेलायत र जर्मनीसँग पत्राचार भइरहेकोउ उनले बताए । त्यसैगरी राष्ट्रपति विद्यादेवी भण्डारी र चीनका राष्ट्रपति सि चिनफिङबीच भएको वार्ताको क्रममा चीन सरकारले अनुदानमा दिने भनेको १० लाख डोज खोप नेपाल आउने पक्रिया शुरू भएको छ । १० लाख मध्ये दुई लाख डोज तिब्बतबाट तीन दिनभित्र आउने र बाँकी आठ लाख वेइजिङबाट १९ जेठसम्म आइपुग्ने मन्त्री ज्ञवालीले बताए ।