धरानः धरानस्थित बीपी कोइराला स्वास्थ्य विज्ञान प्रतिष्ठानको बेथितिविरुद्ध काठमाडौंमा प्रदर्शन गरिएको छ ।
‘नागरिक आन्दोलन’ समूहले माइतीघरमा शिक्षा र स्वास्थ्य क्षेत्रमा भएको चरम राजनीतिकरण अन्त्य गर्न भन्दै प्रदर्शन गरेको हो । सो क्रममा प्रदर्शनकारीहरुले ‘स्वतन्त्र यो प्रतिष्ठानमा, दाग लाग्यो हामी सबैको इमानमा’, ‘चाप्लुसी गर्न जान्दैनौं, तिम्रो दमन मान्दैनौं’, ‘कर तिर्ने नागरिक, कमिसन खाने भिसी र अन्य पदाधिकारी’, ‘फुटबलमा झेली गरे रेडकार्ड, राजनीतिमा झेली गरे नियुक्ति’ जस्ता नारा लेखिएका प्लेकार्ड बाकेर प्रदर्शन गरेका थिए । उनीहरूले बीपी कोइराला स्वास्थ्य विज्ञान प्रतिष्ठान ‘शुद्धीकरण अभियान’ लेखिएकाे कालो ब्यानर बाेकेर प्रदर्शन गरेका थिए ।
यता, प्रतिष्ठानका चिकित्सक, स्वास्थ्यकर्मी तथा नर्सहरुले आइतबार रयाली आयोजना गरेका छन् ।
प्रतिष्ठानमा आन्दोलनरत चिकित्सक तथा स्वास्थ्यकर्मीहरुले प्रतिष्ठानदेखि भानुचोकसम्म रयाली प्रदर्शन गरेका थिए । उनीहरुले कालो व्यानरमा प्रतिष्ठान शुद्धिकरण अभियान नामक व्यानर बोकेर प्रदर्शन गर्न सडकमा उत्रिएका थिए । संघर्ष समितिका पदाधिकारीहरुले आन्दोलनको विषयमा तदारुकता नदेखाए सामूहिक राजीनामा दिने पनि बताउँदै आएका छन् ।
धरानमा ९ राजनीतिक दल र नागरिक दबाव सञ्जाल पनि प्रतिष्ठान सुधारका लागि भन्दै आन्दोलनरत् छन् ।