धरानः नेपाली कांग्रेसले धरानस्थित बीपी कोइराला स्वास्थ्य विज्ञान प्रतिष्ठान थिलथिलो बन्दै गएपनि सरकारको ध्यान पुग्न नसकेको जनाएको छ ।
कांग्रेसले समस्या समाधानमा प्रधानमन्त्री केपी शर्मा ओलीसमेत मौन रहनु दःखद् भनेको छ । प्रतिष्ठानका चिकित्सक, विद्यार्थी र कर्मचारीले विभिन्न माग राखेर गरिरहेको आन्दोलन महिना दिन पुग्न लाग्दा समेत प्रतिष्ठानका कुलपति प्रधानमन्त्रीले विषयलाई गम्भीरतापूर्वक लिएर समाधानको पहल नगरेकोमा पनि कांग्रेसले दुःख व्यक्त गरेको छ ।
कांग्रेस प्रवक्ता विश्वप्रकाश शर्माले शुक्रबार एक विज्ञप्ती जारी गर्दै भनेका छन्– ‘प्रतिष्ठानको कुलपति हुनुको गहन दायित्व र कर्तव्य निर्वाह नगरेर मौन, निरपेक्ष या भूमिका शुन्य बस्नु भनेको आफ्नो जिम्मेवारीप्रतिको चरम गैर जिम्मेवारी हो ।’
प्रधानमन्त्री ओलीले कुलपति हुनुको दायित्व पूरा नगरेको कांग्रेसको आरोप छ । प्रतिष्ठानभित्र अनेकन् बेथिति र अराजकता रहेको औल्याउँदै कांग्रेसले ढाकछोप नगर्न सरकारलाई सचेत गराएको छ ।
कांग्रेसले आन्दोलनमा सरिक चिकित्सक, कर्मचारी र विद्यार्थीहरुसँग सार्थक संवादमार्फत् जायज माग अविलम्ब सम्बोधन गर्न पनि माग गरेको छ ।
‘प्रतिष्ठानको प्रतिष्ठा र भविष्यका लागि अहोरात्र कार्य गरिरहेकाहरुको भावनामा चोट पुयाएर केवल भौतिक संरचनामा संस्थाको भविष्य सुरक्षित गर्न सकिन्न,’ प्रवक्ता शर्माद्वारा जारी विज्ञप्तीमा भनिएको छ, ‘अतः आन्दोलनमा सरिक चिकित्सक, कर्मचारी र विद्यार्थीहरुसँग सार्थक संवादमार्फत जायज माग अविलम्ब सम्बोधन गरेर प्रतिष्ठानभित्र सहज वातावरण निर्माण गर्न नेपाली कांग्रेस कुलपति प्रधानमन्त्रीसँग माग गर्दछ ।’