धरानः हिमाली शिङ्सावा भोटिया समाज धरानको अध्यक्षमा छजुङ लामा निर्वाचित भएको छ ।
समाजको ८ औं अधिवेशनल तथा १७ औं वार्षिक साधारणसभाले छजुङलाई अध्यक्षमा निर्वाचित गरिएको हो । अन्तिम समयमा आएर सहमती नभएपछि चुनाव नै गर्नुपरेको थियो । चुनाव भएपछि अध्यक्षमा चुङ्दाक भोटे र छोजुङ लामा भोटे दुईजनाको उम्मेदवार परेपछि निर्वाचनबाट छोजुङलाई विजयी घोषणा गरिएको हो ।
त्यसैगरी उपाध्यक्षमा पान्देन लामा, सचिवमा अन्दी भोटे, सहसचिव नाम्जा भोटे र कोषाध्यक्षमा छेसाङ भोटे निर्वाचित भए । अन्य सदस्य भने हाल निर्वाचित समितिले मनोनित गर्ने निर्णय गरिएको जनाइएको छ ।
संखुवासभा जिल्लाको शिङ्सा क्षेत्र भोटखोलामा रहेका आदिवासी मूलवासी जसले आफूलाई भोटे समेत परिचित गराउने शिङ्साबा समुदायहरु विगत २०६० सालबाट संगठित भएर धरानमा बसोबास गर्दै आएका छन् ।
शिङ्सा क्षेत्रबाट जडिबुटी बिक्री व्यापार गर्दै आएका शिङ्साबा समुदायको मुख्य पेशा हो । आफ्नो पहिचान स्थापित गर्नका लागि तथा मर्दा पर्दाको अवस्थामा साथ सहयोग गर्ने उद्देश्यले गठन भएको यो संस्था हाल धरान उपमहानगर वडा नम्बर १५ मा संस्थागत भएर बसेको छ ।
धरान उपमहानगर वडा नम्बर १५ बगरकोटमा धरान उपमहानगरबाट ५ कठ्ठा जग्गा उपलब्ध गराएपछि त्यहाँ सामुदायिक भवन तथा क्षाबेनाङ्ज्यो शिङ्सा क्षोलिङ गुम्बा समेत निर्माणाधीन भइरहेको छ । आदिवासी जनजाति उत्थान राष्ट्रिय प्रतिष्ठानमा ल्होमी शिङ्साबा भनेर सूचीकरण भएको समुदायको पहिचानमा बनिरहेको गुम्बा निर्माणमा प्रदेश सांसद उमिता बराइलीमार्फत् ७ लाख, प्रतिनिधि सांसद जयकुमार राईको निर्वाचन क्षेत्र विकास कोषबाट १० लाख बजेट उपलब्ध गराएपछि सो भवन निर्माण भएको हो ।