धरानः धरानमा साम्सोहाङ परिवार कल्याण संघले प्रदेश नं. १ का सामाजिक विकास मन्त्री बलबहादुर साम्सोहाङलाई सम्मान तथा बधाई ज्ञापन कार्यक्रम आयोजना गरेको छ ।
बुधबार साम्सोहाङ परिवार कल्याण संघको कार्यालय धरान–१९ मा अध्यक्ष लगत समसेर साम्सोहाङ अध्यक्षतामा कार्यक्रम सम्पन्न भएको थियो । कार्यक्रममा सामाजिक विकास मन्त्री साम्सोहाङले कार्यक्रममा धन्यावाद ज्ञापन गर्दै प्रदेश १ का जनतालाई रोजगारी प्रदान साथै जनताको जीवनस्तरमा सुधार गर्नेलगायत खेलकुदमा सुधार ल्याउने जस्ता योजनाहरु बन्दै गरेको बताएका छन् ।

ताप्लेजुङ पुख्यौली थलो भएका लिम्बू जातिको एक जाति साम्सोहाङ परिवारलाई संगठित गर्न, वंशावली निकाल्न र परिवारका पछाडि परेकाहरुलाई अगाडि बढाउन केन्द्रीय अध्यक्ष लगत समशेर सुब्बाको ठूलो योगदान रहेको मन्त्री साम्सोहाङले जानकारी दिए । उनले ९१ वर्षीय लगत समशेर साम्सोहाङमा अहिले पनि सक्रिय रहेको र अहिलेको धरान नगरको विकासमा पनि उनको महत्वपूर्ण योगदान रहेको बताए ।
मन्त्री बलबहादुर साम्सोहाङ परिवारवाट मन्त्री बन्ने पहिलो व्यक्ति भएको केन्द्रीय अध्यक्ष लगात समशेर साम्सोहाङले बताए । साम्सोहाङ परिवार देश विदेशको जुनसुकै ठाउँमा बसेको भएपछि एक आपसमा सम्बन्ध र परिचय हुनपर्ने उनको धारणा रहेको थियो । उनले अहिलेको राजनीतिक दलहरुको नेतृत्व सही नभएकाले देश अघि बढ्न नसकेको बताउँदै अब इमान्दार, देश विदेश घुमेर धेरै कुरा बुझेका भूपू लाहुरेहरुले देशको नेतृत्व गर्न आवश्यक भएको धारणा राखे ।
कार्यकममा प्रा.डा. टंक न्यौपाने, डा. योगेन्द्र पालुङ्वा, बम देवान, जुली साम्सोहाङ, बालनन्द साम्सोहाङ र माओवादी केन्द्रका नेता अइन्द्रविक्रम बेघाले मन्त्री साम्सोहाङलाई बधाई तथा शुभकामना व्यक्त गरेका थिए । अधिकांश वक्ताले धरानको सामाजिक समस्याको विषयमा पनि ध्यान दिन मन्त्रीलाई अनुरोध गरे । बधाई कार्यक्रमपछि संघको साधरणसभा सम्पन्न भएको संघका उपाध्यक्ष लेखी सुब्बाले बताए ।