धरानः गीतकार तथा संगीतकार उमेश रेग्मीले भारतीय गायिका सञ्जीवनीको आवाजमा रहेको नयाँ गीत ‘प्रिय तिम्रो तस्वीर कोर्न लाग्छ’ आफ्नो युट्युब च्यानल गोत्र इन्टरटेनमेन्ट मार्फत् सार्वजनिक गरेका छन् ।
पुरानो हुँदैन माया, डाँडापाखा छहाराले, पानी मिठो मेरो हजुर जस्तो सदाबहार नेपाली गीतकी गायिका सञ्जीवनीको नयाँ नेपाली गीत लामो समयको अन्तरालमा सार्वजनिक भएको हो ।
गीतकार तथा संगीतकार उमेश रेग्मीको भावलाई गायिका सञ्जीवनीले आफ्नो आवाजको जादुले अझ कर्णप्रिय बनाइदिएकी छिन् । उनको पुरानो गीतहरुझै यो गीत पनि युगौयुगसम्म सुनिने गीतहरुको श्रेणीमा पुगेको छ । देवेन्द्र नेवाको संगीत संयोजन रहेको गीतकार तथा संगीतकार उमेश रेग्मीको यो गीत उनको उत्कृष्ट सृजना बन्न पुगेको छ ।
म्युजिक भिडियोसहित सार्वजनिक गरिएको गीतको भिडियोको निर्देशन सोनम पाख्रिन, छायाङ्कन बुद्ध थापा, सम्पादन सुशील न्यौपानेले गरेका छन् भने स्मृति श्रेष्ठ र कमल सिंहको अभिनय भिडियोमा हेर्न सकिन्छ ।