धरानः कोशी प्रदेश सरकारको मनमोहन प्राविधिक विश्वविद्यालयको आंगिक शिक्षालय मनमोहन पोलिटेक्निकका विद्यार्थीहरुले आफैले चलाउने सवारीमा चालक आफैले आफनो अल्कोहल टेष्ट गर्नसक्ने उपकरण निर्माण गरेका छन् ।
पोलिटेक्निकको डिप्लोमा मेकानिकल तर्फका तेस्रो वर्षका विद्यार्थीले ६ महिना लगाएर कुनैपनि सवाारीमा जडान गरेर चालकले कति प्रतिशत अल्कोहल (रक्सी) खाएको छ र चलाउन सकने अवस्थामा छ छैन भन्ने पत्ता लगाउन सक्ने उपकरण बनाएका हुन् ।
विद्यार्थीहरुका अनुसार अल्कोहल उपकरणलाई स्तरोन्नति गरेर कार, वाइक, बस, ट्रक जुनसुकै सवारीको इन्जिनमा जडान गर्न सकिन्छ । यदि चालकले ४० प्रतिशत भन्दा बढी रक्सी सेवन गरेको रहेछ भने उक्त उपकरणले तत्काल सिग्नल दिन सक्छ । जसले ‘तिमीले धेरै रक्सी खाएका छौ यसैले सवारी चलाउन योग्य छैनौ’ भन्ने सन्देश दिन्छ । यसैले यो उपकरणले दुर्घटना न्युनीकरण गर्न सहयोग पुरयाउने पोलिटेक्निकका इन्जिनियर तथा शिक्षक दीपेन्द्र यादवले बताए । उनका अनुसार चालु शैक्षिक सत्र मेकानिकल इन्जिनियरिङ तेस्रो वर्षका विद्यार्थीहरूले विभिन्न पाँचवटा अविष्कारहरु गरेका छन् ।
गियरवाला विद्युतीय मोटरसाइकल पनि बनाए
यसैगरी पोलिटेक्निककै इन्जिनियरिङतर्फका विद्यार्थीहरुले गियरवाला विद्युतीय मोटरसाइकल पनि निर्माण गरेका छन् । विद्यार्थीहरूका अनुसार हाल बजारमा सञ्चालन भइरहेका इलेक्ट्रिक मोटरसाइकलहरूमा गियरको प्रबन्ध छैन । यो प्रविधिलाई स्तरोनोन्तरी गरेर बजारमा गियरवाला मोटरसाइकल सञ्चालन गर्न सकिने शिक्षक तथा इन्जिनियर रामकुमार यादवले जानकारी दिए । इन्जिनियर रामकुमार यादवका अनुसार चालु वर्ष इन्जिनियरिङतर्फका विद्यार्थीले ५ वटा र इलेक्ट्रिक इन्जिनियरिङतर्फका विद्यार्थीले विभिन्न ३ वटा आविष्कारहरू प्रदर्शन गरेका छन् ।
विद्यार्थीहरूले सोमबार पोलिटेक्निक परिसरमा बेट्रीबाट चल्ने ह्रिव्यल चेयर, हाइड्रो पावर, ट्रान्सफरमर इलेक्ट्रिक कन्ट्रोलर र स्वचालित कार , अल्कोहल टेष्ट डिभाइस, गियरवाला इलेक्ट्रिक मोटरसाइकल आदि विभिन्न अविष्कारहरू प्रर्दशन गरेका छन् ।
विद्यार्थीहरुले गरेको अविष्कारको प्रदर्शन विश्वविद्यालयका उपकुलपति डा. सुवासश्री पोखरेल रजिष्टार डा. दिलनाथ फुयाँल, उद्योगी सोम घिमिरे, सामाजिक विकास मन्त्रालयका उपसचिव फणिन्द्र खत्री लगायतले अवलोकन गरेका थिए ।