धरानः देशभरका अस्पतालमा मंगलबार आकस्मिक बाहेकका सबै सेवा बन्द हुने भएको छ ।
चिकित्सकहरू आन्दोलित बनेसँगै देशभरका अस्पतालमा आकस्मिक बाहेकका सेवा बन्द हुने भएको हो । साउन ९ गते वीरगञ्जस्थित नारायणी अस्पतालमा कार्यरत चिकित्सक तथा स्वास्थ्यकर्मीमाथि भएको हातपातको विरोधमा चिकित्सकहरू आन्दोलित भएका हुन्।
नेपाल चिकित्सक संघले उक्त घटनाको विरोधमा अस्पतालमा सेवा बन्द गरिएको विज्ञप्तिमार्फत जनाएको छ । ”चिकित्सक तथा स्वास्थ्यकर्मीमाथि राज्यले गरेको दमनको विरोधमा मंगलबार देशभरका अस्पतालमा आकस्मिक बाहेकका सेवा बन्द गर्दछौँ,” चिकित्सक संघको विज्ञप्तिमा भनिएको छ ।
नारायणी अस्पतालमा बिरामीको मृत्युपछि चिकित्सकमाथि हातपात गर्दा डा. प्रमोद रामको टाउकोमा चोट लागेको छ । उक्त घटनामा संलग्न दोषीलाई तत्काल पक्राउ गर्दै कारबाही गर्न संघले माग गरेको छ ।