धरानः धरानस्थित बीपी कोइराला स्वास्थ्य विज्ञान प्रतिष्ठानको कोभिड १९ अस्पतालमा उपचारको क्रममा एक कोरोना संक्रमितको मृत्यु भएको छ ।
मोरङका कोरोना भाइरस संक्रमित पुरुषको धरानमा आइतबार राति मृत्यु भएको हो । मोरङको धनपालथान गाउँपालिका–६ का ४० वर्षीय पुरुषको उपचारका क्रममा राति ८ः४५ बजे मृत्यु भएको प्रतिष्ठानका प्रवक्ता डा. निदेश सापकोटाले बताए । उपचारका लागि प्रतिष्ठान लगिएका मृतकमा भदौ २६ गते संक्रमण पुष्टि भएको थियो ।
अर्थो अवजरवेसन वार्डमा राखेर उपचार गराइरहेका उनमा कोरोना संक्रमण पुष्टि भएपछि प्रतिष्ठानकै कोभिड अस्पतालमा भर्ना गरिएको थियो । मृतकमा कुनै पनि दीर्घ रोग रहेको नपाइएको प्रतिष्ठानका प्रवक्ता डा. सापकोटाले बताए ।
मृतकको शव व्यवस्थापन स्वास्थ्य मापदण्डअनुसार भइरहेको प्रवक्ता डा.सापकोटाले जानकारी दिए । यसअघि हिजो नै दिउँसो २ बजेर १८ मिनेटमा विराटनगर १२ का ७० वर्षीय पुरुषको पनि वीपीको कोभिड अस्पतालमा मृत्यु भएको थियो ।