धरानः धरानमा आज एकैदिन २६ जनामा कोरोना पोजेटिभ रिपोर्ट आएको छ । योसँगै धरानमा कुल संख्या संक्रमित संख्या ३५७ पुगेको छ ।
इलाका प्रहरी कार्यालय, वडा प्रहरी कार्यालय धरानका ६ जना प्रहरीसहित अन्यमा कोरोना पोजेटिभ देखिएको धरान उपमहानगरपालिका स्वास्थ्य महाशाखाका प्रमुख उमेश मेहताले जानकारी दिए ।
फुस्रेस्थित आर्मी क्याम्पका सेना ७ जनामा पनि कोरोना पोजेटिभ देखिएको छ । यस्तै, धरान–१७ का एउटै परिवारका ९ जना र उनीहरूकै छिमेकी एकजनामा पनि कोरोना पोजेटिभ रिपोर्ट आएको उनले जानकारी दिए । उनीहरू मङ्गलबार मृत्यु भएका धरान–१७ का एक वृद्धको परिवार रहेको जनाइएको छ । उनीहरू १८ देखि ६४ वर्ष उमेर समूहका रहेको उनले जानकारी दिए ।
यस्तै, धरान–१५ को ३५ वर्षीय पुरुष, धरानस्थित बीपी कोइराला स्वास्थ्य विज्ञान प्रतिष्ठानमा ज्वरो आउने, खोकी लाग्नेलगायतको समस्या लिएर पुगेका धरान–७ का ४२ वर्षीय पुरुष, धरान–१२ का ३८ पुरुष पनि कोरोना पोजेटिभ देखिएको छ ।