धरानः धरानमा अज्ञात युवा युवामाथि छुरा प्रहार गरेर फरार भएका छन् ।
धरान-१५ स्थित सदन रोडमा करिब साढे ८ बजेतिर यस्तो घटना भएको हो । इलाका प्रहरी कार्यालय धरानका डिएसपी ज्ञानेन्द्रबहादुर बस्नेतले अज्ञात व्यक्तिले छुरा प्रहार गर्दा धरान-१५ का २० वर्षीय कैलाश मरिक घाइते बनेको जानकारी दिए । ‘खै नचिनेको एक व्यक्ति आएर पछाडि ढाडमा छुरा प्रहार गरेको भन्ने ती युवाले खुलाएका छन्,’ उनले भने, ‘फरार रहेका ती व्यक्तिको खोजी तीब्र बनाइएको छ ।’
छुरा प्रहारबाट घाइते बनेका युवा धरान उपमहानगरपालिकामा कार्यरत सफाइ कर्मचारी भएको खुलेको उनले जानकारी दिए । मरिकको बीपी कोइराला स्वास्थ्य विज्ञान प्रतिष्ठानको आकस्मिक कक्षमा उपचार भइरहेको छ । उनको ढाडमा छुरा प्रहार भएको प्रहरीले जनाएको छ । विवादको क्रममा मरिकमाथि एक्कासी छुरा प्रहार भएको स्थानीयले जानकारी दिएको प्रहरीले जनाएको छ ।